Дьокуускай куорат «Дистанция доверия» федеральнай ааксыйаҕа кыттыһыаҕа. edersaas.ru
Киин куорат оҕолоро уонна төрөппүттэрэ балаҕан ыйын 16 күнүгэр күнүс 14.00 чаастан оҕолорго аналлаах итэҕэл төлөпүөнүгэр (8-800-2000-122) туһуланар дьиэ кэргэнинэн сүүрүүгэ кыттыахтара. Маннык ааксыйа олох ыарахаттарыгар түбэспит оҕолору өйүүр пуонда көҕүлээһининэн ыытыллар.
Арассыыйа 8 куоратыгар (ол иһигэр Дьокуускайга, Аргангельскайга, Читаҕа, Оренбурга, Челябинскайга, Тамбовка, Владикавказка уонна Калугаҕа) дьиэ кэргэн хамаандалара сүүрүөхтэрэ.
Бу сүүрүү уратытынан төрөппүттэр оҕолорун кытары итэҕэл төлөпүөнүн нүөмэрин көрдөрөр (800, 2000 уонна 122) ыраахха сүүрүүлэрэ буолар.
Онон, киэҥ хабааннаах ааксыйа кырачаан, обургу оҕолорго уонна төрөппүттэргэ аналлаах босхо уонна кистэлэҥ психологическай көмө сулууспатын нүөмэрин мэлдьи өйдүү сылдьарга көмөлөһүөҕэ.
Сүүрүү кыттыылаахтара 5-9 саастаах уонна 10-14 саастаах оҕолордоох икки хамаандаҕа арахсыахтара. Кыттыылаахтар сыаналаах бириистэри ылар иһин куоталаһыахтара, ону таһынан, өйдөбүнньүк сувенирдары тутуохтара.
Сыала-соруга
«Дистанция доверия» сүүрүү үгүс ыалга көхтөөх уонна чэбдик сынньалаҥы көҕүлүүргэ, оҕолор уонна төрөппүттэр икки ардыларыгар хардарыта бииргэ өйдөһүүгэ көмөлөһүөн сөп.
Ааксыйа сыала-соруга – биһиги бары олох «уһунун» («дистанциятын») туоруурбутун санатыы. Олоххо араас моһоллор көстөллөр, ол гынан баран, биһиги соҕотох буолбатахпыт, аттыбытыгар үтүө санаа илиитин утары уунарга бэлэм чугас дьоннордоохпут. Кинилэр истэригэр, саарбаҕа суох, төлөпүөнэн көмөлөһөр оҕо психологтара бааллар.
–Маннык маассабай сүүрүүлэри ыытан, ханнык баҕарар ыарахан кэмҥэ 8-800-2000-122 эрийиэххэ сөбүн санатабыт. Үрдүк таһымнаах исписэлиис хаһан баҕарар оҕо уонна төрөппүт муунтуйуутугар, санааҕа ылларыытыгар уонна кыһалҕалары быһаарарга сөптөөх суолу булалларыгар көмөлөһүө.
Ааксыйа чаҕылхай көстүүлэрин куорат олохтоохторо интэриэһиргиэхтэригэр эрэнэбит. Тоҕо диэтэххэ, сүүрүү – санаа-оноо аалыытын уонна стреһи утары охсуһарга биир көдьүүстээх ньыма, – диэн олох ыарахаттарыгар түбэспит оҕолору өйүүр пуонда бырабылыанньатын бэрэссэдээтэлин солбуйааччы Елена Куприянова кэпсиир.
Сүүрүү иннинэ ыалдьыттарга интерактивнай былаһааккалар үлэлиэхтэрэ. Былаһааккалар уонна ааксыйа туһунан сиһилии иһитиннэриини оҕо итэҕэлин төлөпүөнүн саайтыгар telefon-doveria.ru көрүөххэ сөп.
Надежда ЕГОРОВА, «Саха сирэ» хаһыат, edersaas.ru