Бу күннэргэ Бүлүү бөлөх улуустарын уопсастыбанньыктара мустан, Бүлүү куоракка айылҕа харыстабылыгар туһаайыллыбыт ис хоһоонноох улахан тэрээһини ыыттылар.
edersaas.ru
Онно ыаллыы улуустартан Сунтаартан, Ньурбаттан, Бүлүүттэн уонна Үөһээ Бүлүүттэн оскуола, оҕо саадын кэлэктииптэрэ, бэрэстэбиитэллээх уорган дьокутааттара, Бүлүүтээҕи педколледж, Дьокуускайтан «Ситим» ыччат түмсүүтэ кыттыыны ыллылар.
— Дмитрий Макаров аатынан «Зеленый пояс Вилюя» экологическай пуонда Бүлүүтээҕи педагогическай колледж аактабай саалатыгар «Ыра санаам – ыраас Бүлүүм» диэн Бүлүү өрүс харыстабылыгар туһаайыллыбыт аахсыйаны ыытта.
Ийэ айылҕаҕа истиҥ сыһыаны, төрөөбүт дойдуга тапталы кырачаан киһиэхэ оҕо сааһыттан иҥэрэр соруктаах «Ыра санаам – ыраас Бүлүүм» диэн Бүлүү экологическай пуондата тэрийэн ыыппыт аахсыйатыгар Үөһээ Бүлүүтээҕи «Сказка» оҕо саада эмиэ актыыбынай кыттыыны ылла.
Кырачааннар, кинилэр төрөппүттэрэ уонна иитээччилэр бэйэбит кумааҕынан саха маанылаах көтөрүн — кыталыгы кырыйдыбыт уонна видеоролик таҥан оҥордубут.
«Зеленый пояс Вилюя» экологическай пуонда салайааччыта Прасковья Макарова оҕо уһуйааннарыгар, үөрэх тэрилтэлэригэр актыыбынай кыттыыны ылбыттарыгар махтанан туран, биһиги уһуйааммытыгар икки устуука сибиирскэй яблоня үнүгэһин үөрүүлээх быһыыга-майгыга туттарда, — диэн кэпсииллэр оҕо уһуйаанын иитээччилэрэ Лия Николаева уонна Сардаана Васильева.
Онон Үөһээ Бүлүүтээҕи «Сказка» уһуйаан зональнай таһымнаах тэрээһиҥҥэ кыттан, аата дорҕоонноохтук ааттанна.
Елена ПОТОЦКАЯ, «Саха сирэ» хаһыат, edersaas.ru
Хаартыска — «Сказка» оҕо уһуйаанын архыыбыттан.