Саха сирин ааҕааччылара таптыыр, күүтэр хаһыаттара «Саха сирэ» уонна «Якутия» икки сыл устата ааҕааччыларга босхо тарҕатыллан кэлбиттэрэ. Маннык дьаһал ылыллыбытыгар ааҕааччыларга араас санаа үөскээбитэ: ким эрэ сэҥээрбитэ, ким эрэ сөпсөспөт санаатын биллэрбитэ. Бу быһаарыы барыбытыгар (ол иһигэр, суруналыыстарга) соһуччу буолбута.
edersaas.ru
Уларыйыы тыына
Ол гынан баран, хаһыат ханнык да балаһыанньаҕа, ханнык да кэмҥэ тахсыахтаах, ааҕааччыга тиийиэхтээх диэн бигэ санаабытын ыһыктыбакка, үлэлээбиппит курдук үлэлээн кэлбиппит.
Онтон 2018 сылга «Сахамедиа» холдиҥҥа саҥа салайааччы кэлэн (Алексей Сергеевич Чертков), үөскээбит балаһыанньаны саҥалыы көрүүгэ, ааҕааччыга өссө тупсаҕай хаһыаты тириэрдэр туһугар сонун ньымалары булууга о.д.а. үлэлэр саҕаламмыттара.
Ааҕааччы хаһан баҕарар сыттыктана сытан ааҕарын курдук ыйы быһа «сойбот» сонуннардаах, 40 балаһалаах хаһыаты ааҕааччыга босхо тириэрдиини боруобалаатыбыт, хас да нүөмэр номнуо таҕыста. Дьоммут-сэргэбит бу хаһыаттарбытын үөрүүнэн ылынан, биһигини күүтэллэрин, эрэнэллэрин, биһиэхэ ситиһиини, сайдыыны эрэ баҕаралларын өссө төгүл итэҕэйдибит.
Ааҕааччыларбыт биһигини күүтэллэр
Алексей Чертков салайааччылаах «Сахамедиа» холдинг салалтата «Саха сирэ» (Прокопий Бубякин) уонна «Якутия» (Федор Григорьев) хаһыаттар кылаабынай эрэдээктэрдэрин кытары сүбэлэһэн, 2019 сылга хаһыаттарга суруйтарарга Сурутуу күнүн ыытарга быһаарбыта.
Онон, алтынньы 5 күнүгэр Саха циркэтигэр 600 солкуобайга билиэт атыылаһан кэлбит киһиэхэ бу хаһыаттартан биирдэстэригэр сыл аҥаарыгар суруйтарарыгар кыах бэриллибитэ. Күүтүллүбүтүн курдук, үгүс киһи бэйэтигэр эрэ буолбакка, чугас дьонугар, бэтэрээннэргэ, үөрэппит учууталыгар уо.д.а. бэлэх оҥордо. Билиэттэр түргэнник бүтэн, ытыс соттон хаалбыт дьон билиэт ыйыталаһан, эрэдээксийэ төлөпүөнэ оргуйан олордо.
Алтынньы 5 күнэ, 17.00 ч.
Саха циркэтин киэҥ уораҕайыгар өрөспүүбүлүкэ сүрүн хаһыаттарыгар сүгүрүйээччилэргэ Сурутааччы күнэ саҕаланна.
Циркэҕэ дьон-сэргэ «лыык» курдук муһунна. Кинилэр истэригэр чугас да, ыраах да улуустартан бөлөҕүнэн, дьиэ кэргэнинэн анаан-минээн киирбит дьон бааллар. Ыалдьыттары «Саха сирэ» хаһыат суруналыыстара сахалыы сиэринэн-туомунан, алаадьылаах, итии чэйдээх көрүстүлэр. Ааҕааччыларбыт суруналыыстардыын аһаҕастык кэпсэттилэр, баҕа санааларын уонна махталларын тириэртилэр.
Кэнсиэркэ киириэх иннинэ сурутааччыларбыт биһиги тэрээһиннэрбитигэр мэлдьи көхтөөхтүк кыттар Дьокуускай куорат 1-кы нүөмэрдээх поликлиникатын ыарыыны сэрэтэр отделениетын (сэбиэдиссэй Ефросинья Дьячковская) үрүҥ халааттаах аанньалларыгар буор-босхо доруобуйаларын бэрэбиэркэлэттилэр, анаалыстары туттардылар. Намтан «Дьэрэкээнэ» түмсүү салайааччыта Мария Аманатова сиэл оҥоһуктары оҥоруу, П.Романов аатынан художественнай колледж преподавателэ Надежда Корнилова туостан харысхалыы оҥоруу, үһүс куурус устудьуонката Анна Алексеева сиэли өрүү кистэлэҥнэрин арыйдылар, маастар-кылаас ыыттылар. Татьяна Никифорова-—Тайаана кэлбит дьоҥҥо алгыстаах уруһуйдары кырыйда, тустаах сүбэлэри-амалары биэрдэ. Хаалыктаах хаамыы бастакы хардыыларын Владимир Ивановтан билсибит дьон эмиэ астыммыттара сырдык мичээрдэригэр билиннэ.
19.00 ч.
«SakhamediaStar`t» кэнсиэр саҕаланна.
Кэнсиэрди артыыстар Александр Бурнашов, Николай Гоголев уонна «Сахамедиа» үлэһиттэрэ Роза Борисова, Николай Попов иилээн-саҕалаан ыыттылар. Мустубут дьоҥҥо холдинг генеральнай дириэктэрэ Алексей Чертков:
«SakhamediaStar`t» кэнсиэркэ саха эстрадатын чаҕылхай сулустара, сүрүн ырыаһыттара бары кытыннылар. Ону сэргэ «Сахамедиа» үлэһиттэрэ биллэр артыыстары кытары ыллаһан, көрөөччүлэргэ соһуччу бэлэҕи оҥордулар. «Сахамедиа» холдинг генеральнай дириэктэрин солбуйааччы Афанасий Ноев эстрада тыйаатырын артыыската Алена Яковлева-Дивалыын, «Саха ыала» сыһыарыы эрэдээктэрэ Ангелина Васильева «Туймаада» ансаамбыл ырыаһыта Илья Николаевтыын уонна «Саха сирэ» хаһыат бэтэрээнэ Иван Ксенофонтов, «Якутия» хаһыат компьютерга таҥар отделын үлэһитэ Олеся Чабыкина артыыстартан итэҕэһэ суох толорон, суруналыыстар талааннара муҥура суоҕун туоһулаатылар, көрөөччүлэр куттарын туттулар. Ааҕааччыбыт Валентина Суруйдаана «Саха сирэ» хаһыакка анаан айбыт хоһоонун сыанаҕа тахсан аахта.
ххх
«SakhamediaStar`t» тэрээһин баай ис хоһоонноох буолла. Кэнсиэр кэмигэр «Кристалл» медицинскэй килииникэттэн, «Денталика» стоматологияттан, «Эмп» аптыакаттан, «Самородок» бассейнтан, «Айгуль» маҕаһыыннар ситимнэриттэн уо.д.а. көрөөччүлэргэ сүүйүүлээх бириистэр оонньоннулар. Холдинг СӨ Култуураҕа уонна духуобунай сайдыыга министиэристибэтин кытары бииргэ ыыппыт «Тиллибит хартыыналар» («Ожившие картины») куонкурус кыайыылаахтара билиннилэр. Кыайыылааҕынан «Анимация» айар устуудьуйа ааттанан, 100 тыһыынча солкуобайынан наҕараадаланна уонна үлэ ааптарыгар Залина Балаеваҕа сэртипикээт туттарылынна. Онтон Интэриниэт-куоластааһын түмүгүнэн көрөөччүлэр биһирэбиллэрин ылбыт Ньурба улууһуттан «Бэтиэхэ» дьоҕус-устуудьуйа 50 тыһыынчалаах сэртипикээтинэн бэлиэтэннэ.
Түмүккэ СӨ Суруйааччыларын сойууһун чилиэнэ Мария Алексеева-Арылы Дуйдаах тылларыгар, Иннокентий Гаврильев-Лэкиэс матыыбыгар «Сахамедиа» өрөгөй ырыатын суруналыыстар артыыстары кытары бука бары аренаҕа тахсан толордулар.
Күндү ааҕааччыларбыт, «Сахамедиа» хаһыаттарыгар сурутуҥ. Ахсынньы 20 күнүгэр диэри почтаҕа сурутуу АҺАҔАС!
Надежда ЕГОРОВА,
«Саха сирэ» хаһыат, edersaas.ru
Андрей Сорокин түһэриилэрэ.