«Ааҕыы эйгэтигэр» -– бастакы ыалдьыт

Ааптар: 
Бөлөххө киир:

«Ааҕыы эйгэтэ» («Среда чтения») диэн литературнай хоспут сахалыы тылынан уус-уран литератураны таптааччыларга аһаҕас былаһаакканан буолар. Бибилэтиэкэҕэ суруйааччыны кытары көрсүһүү -– куруук бырааһынньык. Маннык истиҥ көрсүһүүлэр үксүгэр өйгө-санааҕа умнуллубаттыы хаалаллар.

Кулун тутар 16 күнүгэр литературнай хоспутугар бастакы тэрээһин ыытылынна. Тэрээһин ыалдьытынан Арассыыйа Суруналыыстарын, СӨ Суруйааччыларын сойуустарын чилиэнэ Надежда Егорова-Намылы буолла.

Көрсүһүү олус истиҥник, аһаҕастык барда. Көрсүһүү саҕаланыытыгар кэлбит дьоҥҥо Ийэ сылыгар аналлаах сылы быһа туруохтаах быыстапкабытын билиһиннэрдибит. Онтон саха классиктарын кинигэлэрин остуолга ууран, ыалдьыппытыттан кини бу кинигэлэр тустарынан кылгас санааларын этэригэр көрдөстүбүт. Онуоха Надежда Парфеньевна остуолга уурбут 5 кинигэбитин барытын аахпытын уонна кини айар үлэтигэр туох суолталаахтарын, кинигэлэри илиитигэр сыһыары тутан, оҕо сааһыгар төннөн ааспытын туһунан этиититтэн кэпсэтиибит саҕаланна.

Бибилэтиэкэ ааҕааччылара Надежда Егорова-Намылы айар үлэтин, айымньыларыгар сюжеттары хайдах буларын туһунан кэпсээбитин олус сэҥээрэ уонна сэргии иһиттилэр.
Тэрээһин кыттыылаахтара кини кинигэлэрин ырыталларыгар «Намылы бэйэтин кэпсээннэригэр дьоруойдар үөрүүлэрин, хомолтолорун, санааҕа ылларыыларын, дууһаларын мучумаанын бэрт сатабыллаахтык биэрэрин сөбүлүүбүт», «Кини кэпсээннэрин аахтахпытына, аттыбытыгар баар дьон олоҕун-дьаһаҕын билэбит» диэн санааларын үллэһиннилэр. Эдуард Григорьевич Колодезников уонна Сахаайа Дмитриевна Данилова кинилэри долгуппут ыйытыыларын биэрдилэр. Ааҕаачччылар ааптар дьоруойдарын хайдах буларын, инникитин ханнык айымньыга үлэлиирин, сөбүлүүр суруйааччыларын, ордук ханнык улахан айымньы кини суруйар идэтигэр сабыдыаллаабытын уо.д.а. интэриһиргээтилэр. Көрсүһүү кыттыылаахтара бүгүҥҥү ыалдьыттарыгар айар үлэтигэр өссө да улахан ситиһиилэри баҕардылар.

Түмүккэ биһиги суруйааччылар Намылы уонна Иннокентий Попов-Оҕуруоттаах бииргэ суруйбут «Тайҕа таайыллыбатах таптала» диэн кинигэлэригэр илии баттатан бэлэх туттубут. Биһиги ааҕааччыларбыт саха айар дьоҕурдаах дьонун, суруйааччыларын кинилэр кинигэлэринэн эрэ буолбакка, сирэй көрсөн билэллэрин туһугар маннык көрсүһүүлэри ыытар наадалаах уонна улахан суолталаах дии саныыбыт.

Надежда Егорова-Намылы «Дьахтар абылыыр айылгыта» уонна «Тайҕа таайыллыбатах таптала» кинигэлэрин көрбөттөргө анаан Саха тыйаатырын артыыһа Елизавета Потапова уонна суруналыыс Наталья Кычкина аахпыттара пуондабытыгар хараллан сытар.

Көрбөттөр өрөспүүбүлүкэтээҕи бибилэтиэкэлэрэ сахалыы хоһооннору, кэпсээннэри истэргэ, ааҕарга уонна дьүүллэһэргэ баҕалаах дьону ыҥырар.

«Саха сирэ», edersaas.ru cаайтка анаан

Ульяна ЧИЧИГИНАРОВА,

Көрбөттөр өрөспүүбүлүкэтээҕи бибилэтиэкэлэрин бибилэтиэкэрэ

+1
0
+1
0
+1
0
+1
0
+1
0
+1
0
+1
0