Дьокуускай киин болуоссатыгар өрөспүүбүлүкэтээҕи II кинигэ бэстибээлэ аһылынна. Бу, атырдьах ыйын 24-25 күннэригэр ыытыллар кинигэ уонна ааҕыы улахан бырааһынньыгар Ленин аатынан болуоссака сарсыардаттан элбэх киһи тоҕуоруста – кинигэни уонна хаһыаттары, сурунааллары таһаарааччылар, полиграфистар, бибилитиэкэ үлэһиттэрэ уонна, биллэн турар, суруйааччылар итиэннэ ааҕааччылар.
Бэстибээли үөрүүлээхтик аһыыга СӨ инновацияларга, цифровой сайдыыга уонна инфокоммуникационнай технологияларга миниистирэ Анатолий Семенов эҕэрдэ тылы этэн туран, бастыҥ үлэлээх издательстволарга, медиа-холдиннарга, бибилитиэкэ үлэһиттэригэр наҕараадалары, махтал суруктары туттарда. Кинилэр ортолоругар “Бичик” кинигэ кыһата, “Сахамедиа”, “Якутия”, “Ситим”, о.д.а. тэрилтэлэр бааллар.
“Ааҕар Саха сирэ” бэстибээлгэ күнү быһа нон-стоп эрэсииминэн сүрүн сцена, айар былаһааккалар, издателлэр бастыҥ табаардарын дьаарбаҥка-быыстапката үлэлиир. Манна хайа баҕарар кинигэни маҕаһыыннааҕар чэпчэки сыанаҕа атыылаһыахха сөп. Үгэс быһыытынан, маастар-кылаастар, суруйааччылар кыттыылаах автограф-сессиялар, сэдэх кинигэлэр быыстапкалара, саҥа айымньылар презентациялара, аукцион, литературнай check-up ыытыллаллар.
Ол курдук, Олег Сидоров “ЖЗЛ” сериянан Былатыан Ойуунускай үбүлүөйдээх 125 сылын көрсө таһаарбыт “Платон Ойунский: пылающий камень Сата” кинигэтин сүрэхтэниитэ, “Атырдьах ыйа—эдьиийим” поэтическай марафон, “Түргэн ааҕыыга өрөспүүбүлүкэтээҕи бастакы чемпионат” куонкурус, суруйааччы Василий Яковлев “Кытта кырдьыбыт тэҥкэ тиит” кинигэтин сүрэхтээһин (бу айымньыга олоҕуран “Тойон Кыыл” киинэ уһуллубута), о.д.а тэрээһиннэр дьон болҕомтотун тартылар.
Кырачаан ааҕааччыларга интерактыыбынай бырагыраамалаах анал былаһаакка аһылынна.
Ааҕааччыларга анаан “кинигэ шведскэй остуола” сонун акция, араас куонкурустар, оонньуулар, викториналар, бириистэри оонньотуу, эстрада артыыстарын уонна эдэр талааннар эҕэрдэ кэнсиэрдэрэ күнү быһа бара тураллар.
Бэстибээл кэмигэр биир интэриэһинэй тэрээһининэн “Сахамедиа” холдинг “Саха сирэ” уонна “Якутия” хаһыаттарга чэпчэтиилээх сурутууну ыытыыта буолла. Манна, медиахолдинг генеральнай дириэктэрин солбуйааччы А.И.Ноев аан бастакы сурутааччыга анал бэлэҕи туттарда. Онон, бэртээхэй “Bosch” электроөтүүк хаһаайкатынан Людмила Мамонтова буолла.
—Мин “Саха сирэ” уонна “Якутия” хаһыаттарга иккиэннэригэр суруттардым. Хата, чэпчэтиилээх сурутууга түбэстим. Өссө бэлэх тутан, соһуччу үөрүү буолла. “Сахамедиа” үлэһиттэригэр махтал! Биһиги дьиэ кэргэн өрөспүүбүлүкэ хаһыаттарын мэлдьи ааҕабыт, сурутабыт. Тоҕо диэтэххэ, өрөспүүбүлүкэҕэ, дойдуга буола турар сабыытыйалары кэмигэр, кырдьыктаахтык сырдаталлар. Итиэннэ, кэргэмминээн, муосчут, худуоһунньук, педагог Константин Мамонтовтыын иккиэн Арктикатааҕы култуура уонна искусство институтугар үлэлиир дьон, ордук култуура, искусство, духуобунас эйгэтин сырдатыылары кэтээн ааҕабыт, үлэбитигэр туһанабыт. Онон, хаһыакка сурутар – эргиччи туһалаах!, — диэтэ Людмила Николаевна.
Сарсын, атырдьах ыйын 25 күнүгэр бэстибээл салгыы ыытыллар. Ааҕааччылар, куорат олохтоохторун уонна ыалдьыттарын болҕомтолорун сарсыарда 10 ч. буолар “Өксөкүлээх Өлөксөй Сеймчаннааҕы дневнигэ” саҥа кинигэ, 14:40 ч. турок тылыгар тылбаастаммыт М.К.Аммосов туһунан саҥа кинигэ сүрэхтэниилэриттэн саҕалаан, араас интэриэһинэй тэрээһиннэр күүтэллэр. Ол курдук, “Якутия” медиа-холдинг кинигэлэрин презентацията, норуот маастардарын быыстапкалара, “Минньигэс кинигэ” аукцион, Клавдия уонна Герман Хатылаевтар, “Ыллыыр Мыраан” вокальнай лааҕыр талааннаах оҕолорун кэнсиэртиир бырагыраамалара, о.д.а. ыытыллыахтара. 16:30 ч. кинигэ бэстибээлин үөрүүлээхтик сабыы уонна салгыы оһуохай буолуоҕа.
Татьяна МАРКОВА, edersaas.ru
Мария ВАСИЛЬЕВА (СИА) хаартыскаҕа түһэриилэрэ.