Дьокуускайга атырдьах ыйын 24-25 күннэригэр “Ааҕар Саха сирэ” кинигэ бэстибээлэ иккис төгүлүн ситиһиилээхтик ыытылынна.
Тэрийээччи “Бичик” кинигэ кыһата бастыҥ ааптардар, худуоһунньуктар уонна саҥа саҕалааччылар ааттарын биллэрдэ. Ол курдук, генеральнай дириэктэр Август Егоров “Национальнай кинигэни таһаарыы сайдыытыгар кылаатын иһин” бэлиэни экономическай наука доктора, профессор Василий Дарбасовка, талааннаах худуоһунньук Дьулустаан Бойтуновка, РФ уопсай үөрэҕирииитин Бочуоттаах үлэһитэ, учуобунньуктары оҥорооччу Лариса Захароваҕа туттарда.
Ону тэҥэ, “Бичик” уонна Ил Дархан, бырабыыталыстыба дьаһалтатын тыллары сайыннарыы управлениета тэрийбит куонкурустарын түмүгүн таһаардылар.
Оҕо кинигэтигэр “Бастыҥ ааптар” аатын норуодунай бэйиэт Иван Мигалкин “Алыптаах дойдуга” кинигэтинэн ылла. “Прозаҕа” кыайыылааҕынан Владислав Авдеев ааттанна («Запретная любовь» кинигэ). “Поэзияҕа” норуодунай бэйиэт Наталья Харлампьева «Мин аалым – балаҕаным» кинигэтинэн бастаата. “Үөрэх кинигэтигэр” Михаил Аввакумов «Сурук-бичик» кинигэтинэн бастаата.
“Бастыҥ саҥа саҕалааччы” аатын Виталий Егоров («Адычанская трагедия») ылла. «Научнай-популярнай таһаарыы» номинацияҕа Валентина Бочонина «Ысыах в благословенной долине Туймаада» кинигэтэ кыайда. «Аҕыйах ахсааннаах төрүт омуктар литератураларыгар» норуодунай суруйааччы Андрей Кривошапкин «Тормита буюсэмҥэ» («Охотник Тормита») бастаата. «Норуот үгэстэрин харыстааһын» номинацияҕа Людмила Жиркова «Оҕуруолаах оҥоһуктар» кинигэтэ бастыҥынан ааттанна. «Бастыҥ фотограф» аатын Мария Васильева ылла. «Оҕо кинигэлэригэр бастыҥ худуоһунньук» — Маргарита Яковлева, «Уус-уран айымньыларга бастыҥ худуоһунньук» — Александр Баишев. «XXI үйэ кинигэтэ» куонкуруска “Электроннай таһаарыыны бастыҥ оҥорооччу” номинацияҕа Марина Макеева бастаата.
Кинигэ бэстибээлэ икки күнү быһа тигинэччи үлэлээтэ. Дьокуускай киин болуоссатыгар 70-тан тахса араас тэрээһиннэр, презентациялар ыытылыннылар. Манна араас улуустартан, киин куораттан 24 тэрилтэ кыттыыны ылла. Барыта 7 тыһыынча киһи сырытта, балартан 5,5 тыһыынча киһи кинигэ атыылаһан, илии тутуурдаах, өттүк харалаах барда. Ол өрөспүүбүлүкэ олохтоохторо кинигэни ааҕалларын, атыылаһалларын көрдөрөр.
Август Егоров этэринэн, бу улахан тэрээһини “Бичик” бэйэтэ тэрийэн ыыппыт. Инникитин Култуура министиэристибэтэ, бырабыыталыстыба бу дьоһуннаах тэрээһини өрөспүүбүлүкэтээҕи былааҥҥа киллэрэн, үп-харчы көрөллөрүгэр уонна “Ааҕар Саха сирэ” бэстибээл сыл аайы салҕанан, үтүө үгэскэ кубулуйарыгар баҕарда.
Ангелина Васильева, “Саха сирэ” хаһыат, edersaas.ru