Соторутааҕыта «Ааҕар дьиэ кэргэн — ааҕар Саха сирэ» диэн өрөспүүбүлүкэтээҕи тэрээһин куйаар ситиминэн буолла.
Бу национальнай бибилэтиэкэ тэриллибитэ 95 сылыгар аналлаах тэрээһиннэр чэрчилэринэн итиэннэ «Бииргэ ааҕабыт» өрөспүүбүлүкэ бибилэтиэкэлэрин бырайыагынан ыытыллыбыт.
—Улуустартан барыта 15 дьиэ кэргэн кыттыбыт. Куйаар ситиминэн ыытыллыбыт тэрээһиҥҥэ Таатта улууһун аатыттан биһиги Дьохсоҕоммутугар олорор Яковлевтар дьиэ кэргэн кытыннылар. Октябрина Петровна, Саргылаана Егоровна уонна Мичийэ биэс түһүмэхтээх квиз-оонньууга кыттаннар, кыайыылааҕынан таҕыстылар, — диэн М.А.Петров аатынан бибилэтиэкэ сэбиэдиссэйэ Галина Другина үөрүүлээх сонунун иһитиннэрэр. —Күрэскэ национальнай бибилэтиэкэ историятын, Саха сирэ Аҕа дойду сэриитигэр кыттыытын туһунан ыйытыыларга хоруйдаабыттар. Салгыы анаграмманы (буукубалары атастаһыннаран тылы, һс хоһоонун, бэргэн этиини таһаарыы), киинэлэртэн быһа тардыылары, эмодзинан мультипликационнай киинэлэри таайыы күөн күрэстэрэ ыытыллыбыт. Икки бастакы ыйытыыга ыал эбээтэ Октябрина Петровна уонна күн күбэй ийэ Саргылаана Егоровна хоруйдаабыттар. Кэнники түһүмэхтэргэ үһүөн туох баар кыһамньыларын ууран кыттаннар, саамай элбэх баалы ылбыттар уонна кыайыылааҕынан тахсыбыттар.
Яковлевтар дьиэ кэргэн биһиги бибилэтиэкэбит биир саамай көхтөөх ааҕааччылара. Эбээлэрэ Октябрина Петровна олоҥхо дьыктаанын «туйгун» сыанаҕа суруйан, эргиччи киэҥ билиилээҕин көрдөрбүтэ. Улахан кыыс Айта «Стр 19» дорҕоонноохтук ааҕыы Арассыыйатааҕы күөн күрэһигэр кыттан, өрөспүүбүлүкэҕэ кыайыылааҕынан тахсан турар. Мичийэ быраатын Дуоланы бибилэтиэкэҕэ куруук сиэтэн илдьэ кэлэр. Сөбүлээбит сурунаалларын, кинигэлэрин уларсаннар, ааҕа охсоору дьиэлэригэр тиэтэйэллэр. Иллээх ыал ийэтэ Саргылаана Егоровна наһаа кыһамньылаах учуутал. Кини үөрэтэр, салайар кылааһын оҕолоругар уус-уран литератураны ааҕалларыгар улахан болҕомтотун уурар.
Нэһилиэкпит биир саамай көхтөөхтүк ааҕар ыалын бастакы онлайн-бэстибээлгэ кыайыылаах тахсыбыттарынан, бастыҥ ааҕар дьиэ кэргэн үрдүк аатын ылбыттарынан ис сүрэхпиттэн үөрэн, киэн туттан туран эҕэрдэлиибин. Кинигэ доҕордоноҥҥут өссө элбэҕи ситиһэргитигэр баҕарабын.
