Ааһан эрэр сылы атаарар, кэлэр сылы көрсөр күммүт бу чугаһаан иһэр. Хас биирдии киһиэхэ ааһан эрэ сыл үтүө түмүктэри, умнуллубат түгэннэри бэлэхтиир. Саҥа дьыл буолаары турдаҕына, хас биирдии киһи ааспыт кэмҥэ махтанар, кэлэр сылтан кэрэни, үчүгэйи кэтэһэр үгэстээх.
edersaas.ru
Наталья ИВАНОВА, анестезиолог-реаниматолог быраас:
— 2019 сыл миэхэ саҥа саҕалааһыннары аҕалла. Ол курдук, “Бичик” кинигэ кыһатын кытта “Бастакы көмө” ыйынньык таһаардыбыт. Элбэх тэрилтэлэргэ сылдьан бастакы көмө, доруобуйаны эрдэттэн харыстаныы туһунан нэһилиэнньэҕэ сырдаттыбыт. Ууга түспүтү быыһыырга бастакы көмө, оҕоҕо куттал суох буолуутун, астан сүһүрүү уо.д.а. тустарынан видеороликтары оҥорон тарҕаттыбыт. Ону сэргэ, Дьокуускай куорат Уопсастыбаннай балаататыгар талыллан үлэлэһэ сылдьабын. Үлэбиттэн быыс булан, дьиэ кэргэммин кытары муораҕа сынньанан кэлиим умнуллубат түгэннэри хаалларда.
Инникитин доруобуйа харыстабылын боппуруостарынан нэһилиэнньэҕэ сырдатыыга кэпсиир, иһитиннэрэр баҕалаахпын. Эһиэхэ, бар дьоммор, чэгиэн доруобуйаны, дьолу-соргуну баҕарабын.
Зоя ИГНАТЬЕВА, Өрөспүүбүлүкэтээҕи 2 №-дээх балыыһа пресс-сэкирэтээрэ:
— Өрөспүүбүлүкэтээҕи 2 №-дээх балыыһа үлэтин-хамнаһын сырдатар исписэлиис буоларбынан, уопсай түмүктэри кылгастык этиэхпин сөп. Чуолаан, медицинскэй көмө хаачыстыбатын үрдэтэргэ үгүс үлэ ыытыллар. Отделениелар саҥа тэриллэринэн сэбилэннилэр, ыарыһахтар сытар балааталара эбилиннилэр, үлэһиттэргэ тупсаҕай усулуобуйаны тэрийэргэ ураты болҕомто уурулунна. Эчэйбиттэри көрөр пууҥҥа олохтоох өрөмүөн ыытылынна. Эмтээһин хаачыстыбата үрүҥ халааттаах аанньаллартан тутулуктааҕын сэргэ, үрдүк технологиялаах аппараатттар эмиэ улахан суолталаахтар. Ол да иһин, ортопедия эпэрээссийэлэригэр аналлаах аппарааттар, норкуос-тыынар аппараат уо.д.а. аныгы тэриллэр ылылыннылар. Эһиилги сылга балыыһа салалтатын былаана элбэх. Сыл саҕаланыытыгар доруобуйаны чөлүгэр түһэрэр (реабилитация) отделение аһылларын күүтэбит.
Винокуров Иннокентий Иннокентьевич, торакальнай хирург, медицинскэй наука дуоктара, Арассыыйа Суруйааччыларын сойууһун чилиэнэ:
-Мин тус бэйэм дьоһуннаахтык туттан, оллоонноон олорон эргитэ санаатахпына, ааһан эрэр Дьыл барахсан Сахабыт сиригэр кэрэни кэрэһэлиир улахан хамсааһыны, тэтимнээх сайдыыны толук уурбут дьоллоох кэрдиис кэм. Ол курдук, Сахабыт сирэ, дьоно-сэргэтэ биир санаанан салайтаран, сомоҕолоһон киэн хардыылаах сайдам суолга киирэн, бүтүн Арассыыйа үрдүнэн үрдүк таһымнаах, сайдыылаах дойду буоларбытыгар эрэл үөскээтэ. Ити барыта Саха сирин олохтоохторо түҥ былыргы үйэлэртэн ситимнээх, дирин силистээх, киэн көҕүстээх, күүстээх санаалаах омуктар буоларбытын туоһулуур.
Итинэн ситимнээн, мин хоолдьуктаах бэйэм хонкуйан тураммын сүгүрүйүөм этэ: бу үтүө дойдуну дьоллоох Саха сирэ онорбут түн былыргы одулу, түҥ былыргы лүорбэтлээн, түн былыргы хоро, түн былыргы тумат, түн былыргы канглы, түн былыргы маньчжуур (тунгуус) аҕа уустарыгар уонна бу сири таптаан, сөбүлээн дойду оностубут улуу нуучча уонна да атын омуктарга. Ити ааттаабыт түн былыргы омуктар билигин биир ситим, хаан-уруу буолан, сомоҕолоһон, Саха сирин өссө үрдүк сайдыы кирбиитигэр таһаарыахтара диэн эрэнэбин.
Надежда ЕГОРОВА, “Саха сирэ”, edersaas.ru