Култуура Маны аах

Ааҕааччы суруга: Олоҥхоҕо уһуйбута

Сахабыт норуотун барҕа баайа олоҥхо аан дойду билиниитин ылбытыттан ыла балай да кэм ааста. ЮНЕСКО быһаарыытынан олоҥхо чулуу айымньы буолбутуттан сахалар бары даҕаны тутум үрдээбиппит. Ил Дархан ыйааҕынан сэтинньи ый 25 күнэ олоҥхо күнүнэн бигэргэтиллибитэ.

Биһиги нэһилиэкпит тоҕус улуу олоҥхоһутунан, аҕыс ааттаах артыыһынан биллибитэ ыраатта. Онон 2-с Наахара олохтоохторо бары киэн туттабыт. Аан бастаан, мин өйдүүрбүнэн, Наахара кулуубугар «Дьулуруйар Ньургун Боотур» олоҥхону оччотооҕу дириэктэр, режиссёр Афанасьева Тамара Романовна туруорбута. Кини кэнниттэн олоҥхонон утумнаахтык дьарыктаммыт киһинэн Анисимова Мелания Фёдоровна буолар. Кини кулуупка уус-уран салайааччынан, хас да сыл дириэктэринэн үлэлиир кэмнэригэр тойуксуттар ансаамбылларыгар дьарыктаммыта. Култуура уонна успуорт эстэпиэтэтигэр «Дьээ — буо» ансаамбыл куруук кыттара, лауреат аатын элбэхтик ылбыта. Мин ону үчүгэйдик өйдүүбүн, тоҕо диэтэххэ, Мелания Фёдоровна миэхэ наар тойук тылын тиэмэҕэ сөп түбэһэр гына суруйтарара. Ол иһин кыра кыттыгастаах курдук сананар буоларым.
Пенсияҕа тахсан баран дьүөгэбит Мелания Фёдоровна оскуолаҕа эбии үөрэхтээһин педагогунан үлэлээбитэ, тылынан уус-уран айымньы куруһуогун салайбыта. Ол кэмҥэ мин Наахара Тиэлиги, Чыамайыкы, Бырама оскуолаларын эбии үөрэхтээһиҥҥэ салайарым. Мелания Фёдоровна үлэтигэр үрдүк эппиэтинэстээхтик сыһыаннаһара: элбэх семинардарга сылдьыбыта, норуот тылынан уус — уран айымньыларын хасыһан үөрэппитэ, уопут атастаһа диэн атын нэһилиэктэргэ, оскуолаларга сылдьыбыта. Аан бастакынан улуу олоҥхоһут Н.А.Абрамов-Кынат остуоруйаларын, олоҥхолорун хомуйууну саҕалаабыта. Кини туһунан оскуола оҕолоругар НПК — ҕа дакылаат суруйтарбыта. Дакылаакка оҕолор бириистээх миэстэҕэ тиксэллэрэ. Хас да төгүл олоҥхоҕо аналлаах биэчэрдэри ыыппыппыт. Кини үлэтин опытын тарҕатар сыалтан Наахара оскуолатыгар улуустааҕы » Олоҥхо дойдутун оҕотобун» диэн улахан тэрээһин буолбута. Хоһоону, үгэни ааҕыыга, Абрамов — Кынат остуоруйаларынан сценкаларга күөн күрэстэри ыытарбыт.
Бүгүн  — Олоҥхо күнэ. Онон сибээстээн Наахараҕа биир бастакынан олоҥхону үөрэтиини саҕалаабыт, олоҥхоҕо оҕолору уһуйбут педагогпут, үтүө — мааны дьүөгэбит Анисимова Мелания Фёдоровна туһунан ахтан — санаан аастым.

Елена Прокопьева.

Хаартыскаҕа: М.Анисимова

2
0