Мин Горнай оройуонун Бэрдьигэстээх сэлиэнньэтигэр төрөөбүтүм. Оскуоланы бүтэрэн сырыттахпына миигиттэн хомсомуол бастакы сэкирэтээрэ В. Алексеев: “Амма кырыс сиригэр үлэлии барыаххын баҕараҕын дуо?” — диэн ыйыппыта. Ону: “Дьоммуттан ыйытыам”, — диэн хоруйдаабытым, оччолорго мин 17 саастааҕым.
Дьонум миигин: “Бэйэҥ баҕарар буоллаххына барар буоллаҕыҥ. Онно ийэҥ-аҕаҥ суохтар, бэйэҥ иннигин бэйэҥ көрүнэҕин, ону өйдөө», — диэбиттэрэ. Онон сөбүлэҥнэрин ылбыт курдук санаан, Аммалыыр буолбутум. Миигин кытта аймаҕым уол, Иван Андреев, эмиэ барсыбыта. 1983 сыл муус устар 11 күнүгэр Дьокуускайтан 28 эдэр дьон Аммаҕа айаннаабыппыт. Аара Эмис диэн нэһилиэккэ киирбиппит, биһигини онно көрсөн, Олом-Күөл отделениетыгар илдьибиттэрэ. Олохтоохтор биһиги комсомольскай этэрээппитин кулууп буолан турар былыргы таҥара дьиэтин аттыгар көрсүбүттэрэ, кылгас миитин буолбута, биһиги таһаарыылаахтык үлэлиирбитигэр эҕэрдэ, алгыс тыллар этиллибиттэрэ. Этэрээппит хамандыыра Егор Андросов этэ. Роббек Дмитрий, Шадрин Алексей, Егоров Илья, Игнатьев Саша, Слободчиков Сергей диэн уолаттар бааллара. Отделение бастакы управляющайа Кузьмин Василий Петрович диэн этэ. Биһигини, 22 уолу, биир улахан дьиэҕэ түһэрбиттэрэ, 6 кыыспыт түөрт кыбартыыралаах уопсай дьиэҕэ олохтоммуттара. Бастакы үлэбитинэн пилорама туруохтаах сиригэр дьаама хаһыыта буолбута. Ол кэмҥэ хаар ханан да суох, сайын курдук этэ, тоҕо сылааһай диэн сөҕөрүм. Сайын окко ыыппыттара, күһүөрү хотон үлэтигэр киирэн күүстээх үлэни-хамнаһы саҕалаабыппыт. Бөһүөлэккэ маҥнай электро-уот дизельнэй ыстаансыйанан холбоноро, кэлин үрдүк күүрүүлээх линия уотун киллэрбиттэрэ. 6-7 сыл үлэлээбит кэммэр үлэбит үксүн хотоҥҥо, сайынын окко буолара. Этэрээтинэн күрэхтэһиигэ сылдьарбыт, бастакы этэрээт Мээндиги, онтон Сэргэ Бэс, үһүс Олом Күөл, төрдүс Булуҥнар этилэр. Бу күрэхтэһиилэргэ биһиги, оломнор, икки дуу, үс дуу төгүл бастакы миэстэҕэ сылдьыбыппытын өйдүүбүн. Эмистэн Оломҥо айанныырга суол-иис мөлтөх этэ. Үчүгэй үлэм иһин грамотанан, бастакы истиэпэннээх уордьанынан наҕараадаланыым үлэҕэ, киһи буоларбар күүс-көмө буолбута.
Мин билигин түөрт оҕолоох ыал аҕатабын, биэс сиэннээхпит. Дьокуускайга ДСК собуотугар арматурщигынан үлэлээбитим сүүрбэ сыл буолла. Бэйэбит Хатаска олоробут. Эрчимнээх эдэр сааспыт сылларын туһунан кинигэ таһаардахпытына олус диэн үөрүөм этэ.
Яков Васильевич Аргунов, 1983 с. өрөспүүбүлүкэ хомсомуолун 3 ударнай этэрээтин байыаһа
Хаартыска: интэриниэт