Ааҕааччы суруга: Үҥкүүгэ уйдаран

Ааптар: 
Бөлөххө киир:

Дойду бэрэсидьиэнэ В.В Путин 2022 сылы Арассыыйа норуоттарын култуурунай нэһилиэстибэтин сылынан биллэрбитэ. Ол чэрчитинэн дойду араас муннуктарыгар норуоттар талааннарын көрдөрөр сыаллаах  бэстибээллэр, күөн күрэстэр буолаллар.

Ыам ыйын 14 күнүгэр Дьокуускай куорат таһынааҕы Марха сэлиэнньэтигэр “Танец от сердца” диэн  үҥкүү кэлэктииптэрин өрөспүүбүлүкэтээҕи күрэҕэ ыытылынна. Маныаха Дьокуускай куораттан, Мархаттан, Уус  Алдантан, Чурапчыттан — барыта 11 үҥкүү ансаамбыла кытынна. Сорох кэлэктииптэр куйаар ситиминэн видеоларын ыыппыттар.

Күөн күрэһи сыаналааһыҥҥа 3 киһиттэн састааптаах дьүүллүүр сүбэ үлэлээтэ: Габышева Анастасия Иннокентьевна, Емельянова Светлана Григорьевна, Карамзина Дана Яковлевна.

Сыанаҕа бииртэн  биир эриэккэс көстүүмнээх үҥкүүһүттэр тахсан истилэр, араас норуоттар үҥкүүлэрэ кэрэ муусука доҕулуолунан толорулуннулар.

Күрэх түмүгүнэн кыайыылаахтар ааттаннылар. 2-с истиэпэннээх лауреаттар: “Зоренька”/ кадриль/, “Чэмэлиинэ”т/саха үҥкүүтэ/; 1-кы истиэпэннээх лауреаттар: “Үҥкүү иэйиитэ” /индийскэй үҥкүү/, “Золотая осень” /үбүлүөй вальса/.

Кылаан кыайыылааҕынан буолла Уус  Алдан Мындаабатыттан оҕо саадын үлэһиттэрин үҥкүүтүн ансаамбыла хотугу үҥкүүнү толорон.

Уус алданнар куйаар ситиминэн кытыннылар. Кинилэр көстүүмнэрин, толоруу маастарыстыбатын, устуу хаачыстыбатын дьүүллүүр сүбэ үрдүктүк сыаналаата. Лауреаттарга грамота, кылаан кыайыылаахтарга грамота уонна кубок туттарылынна.

Күөн күрэһи бэйэтин дьикти иэйиилээх сахалыы ырыаларынан ырыаһыт Сахайаан киэргэттэ. Хомоҕой уус тылынан салайан ыытта Мархатааҕы култуура киинин дириэктэрэ Кычкина Анастасия Николаевна.

Мин биир бэйэм көрөөччү быһыытынан, Мархатааҕы тыыл уонна үлэ бэтэрээннэрин “Зоренька” кулууптарын “Кадриль” үҥкүүтүн астынным. Бу кэлэктиип биир сомоҕо буолан үлэлээбитэ 33 сыл буолбут /салайааччы Винокурова Алимпиада Николаевна/. Саамай сөхпүтүм диэн — бу ансаамбылга  80 — 90 саастарыттан тахсыбыт Яныгина Клара Ивановна, Ермолаева Юналия Юрьевна, Прокопьева Акулина Егоровна дьарыктаналлар эбит!

Түмүккэ этиэҕи баҕарыллар : норуоттар култуурунай нэһилиэстибэлэрин сылынан өссө үрдүк таһымнаах араас тэрээһиннэр буола турдуннар!

Елена Прокопьева, уопсастыбаннай кэрэспэдьиэн.

+1
0
+1
0
+1
0
+1
0
+1
0
+1
0
+1
0