Уопсастыбаннай кэрэспэдьиэммит Елена Прокопьева «Рядовой Чээрин» киинэ туһунан санаатын манна ааҕыҥ.
Фронтовик — суруйааччы Тимофей Сметанин “Егор Чээрин”сэһэнинэн киинэни кэтэспиппит балай да ыраатта. Киинэ “Рядовой Чээрин” диэн аатынан бу күннэргэ Дьокуускай куорат бары киинэ тыйаатырдарыгар көрдөрүүгэ таҕыста. Биһиги улахан сиэммитин кытта «Синема» тыйаатырга кэтэһиилээх киинэбитин көрөммүт, улаханнык астынныбыт! Режиссёр Дмитрий Кольцов киинэтин сүрэҕин-быарын биэрэн туран оҥорбут дии санаатым. Сааланы ыйыллыбыт миэстэлэргэ тобус-толору олорон көрдүбүт, биир да мүнүүтэ аралдьыйбакка, тыыммакка да олорон көрдүбүт диэтэххэ туох да омун суох!
Киинэ сүрүн дьоруойа — эдэркээн саха саллаата Егор Чээрин. Булугас өйдөөх, хорсун-хоодуот, сүрдээх сэмэй саха уолун уобараһын сүрүн оруолга оонньообут эдэр артыыс Айтал Степанов итэҕэтиилээхтик арыйда! Киинэҕэ оонньообут сэбиэскэй саллааттар, эписиэрдэр бары даҕаны оруолларын дьиҥ кырдьыгынан көрдөрдүлэр. Туох да оруо маһы ортотунан туттуу-хаптыы, тыл-өс суох: барыта орун оннугар. Снайпер Гурьянов, повар Бычков эмиэ бэйэлэрин оруолларыгар саамай сөпкө талыллыбыттар. Киинэни көрө олорон дьиҥнээхтик итэҕэйэҕин: бу дьиҥнээх сэбиэскэй дьон, Ийэ дойдуларын көмүскэлигэр тыыннарын толук уурарга куруук бэлэмнэр! Омуктар икки ардыларыгар табаарыстыы сыһыан, хардарыта көмөлөсүһүү тиэмэтэ бэркэ арыллыбыт. Сэһэҥҥэ көстөр көрүдьүөстээх түгэннэр киинэҕэ эмиэ табыгастаахтык киирэн биэрбиттэр. Ньиэмэстэри да олус табыллан оонньоотулар. Ордук мин ньиэмэс снайперын көрөн сөхтүм! Кинини балай да өр бултаһан Чээрин өлөрөр. Ол немец снайпера мин элбэхтик көрбүт «На безымянной высоте» диэн киинэбэр баар ньиэмэс снайперыгар олус диэн майгынныыр. Таҥаһа-саба, туттара-хаптара, бэл, кэтит сыҥааҕа!
Оруобуна майгынныыр “ньиэмэһи” булбуттар!
“Егор Чээриҥҥэ” сиэммитин илдьэ барбыппыт да үчүгэй эбит. Улаатан эрэр обургу оҕо, бу киинэни көрөн, элбэҕи билэр, толкуйдуур. Аан дойдуну аймаабыт алдьархайдаах сэрии хайдаҕын, Улуу Кыайыыны ситиһэргэ норуоттар доҕордоһуулара сүдү күүс буолбутун, хас биирдии саллаат толкуйуттан, сатабылыттан, кыайыыга дьулууруттан элбэх тутулуктааҕын өйдүүр буоллаҕына — ол режиссёр кыайыыта!
Бу киинэни көрө илик дьоҥҥо сүбэлиэм этэ: киинэни оҕолоргутун, сиэннэргитин кытта бииргэ көрүҥ уонна ол кэнниттэн ырытыһыҥ!
ЕЛЕНА ПРОКОПЬЕВА, уопсастыбаннай кэрэспэдьиэн
Хаартыска:http://e.nlrs.ru