Өр күүппүт, ситиһии баар буолуо диэн улаханнык эрэммит, Красноярскайга буолбут күрэхтэһиибит түмүгэ хомотто. Уолаттарбыт тустуулара астыннарбата. Элбэх кыһалҕалар, боппуруостар бааллара көстөн таҕыста.
Бастатан туран, эдэр уолаттарбыт бэлэмнэрэ суоҕа көһүннэ. Иккиһинэн, бэтэрээн тустууктарбыт өй, күүс, дьулуур өттүнэн эбиллибэтэхтэр. Үсүһүнэн, биир да тустуук киһи өйүгэр хатанар, чаҕылхай, киириилээх-тахсыылаах тустууну көрдөрбөтө. Төрдүһүнэн, үгүс тустууктарбыт бэйэлэрэ билэр, өрүү туттар албастара суоҕа көһүннэ. Бэсиһинэн, бириэмэни сатаан туһамматтар. Тустуу бүтэрэ аҕыйах сөкүүндэ хаалбытын учуоттаабакка, кыайтардылар. Алтыһынан, харса суох, кыһыйан-абаран туран киирсии суох. Сэниэтэ-оноото суох, сылайбыт, илистибит көрүҥнээхтэр. Эрчиллии кэмигэр күүстэрин бараабыттар дуу, тугуй? Сэттиһинэн, ыарахан ыйааһыҥҥа кырата 2-3 уолу кытыннарыахха баара.
Дьэ, бу этиллибит барыта түмүллэн хотторуу хомолтотун биллибит. Кэлэр өттүгэр балар, о.д.а. итэҕэстэр-быһаҕастар туоратылыннахтарына эрэ ситиһии баар буолуо. Итини этэн туран, урут суруйбут “Өй, күүс, дьулуур быһаарар суолталаахтар” (“Дьулурҕан”, 16.11.2004) диэн ыстатыйам суолталааҕа көстөн таҕыста.
Түмүкпэр, тустуубутугар биир сиргэ тэпсэҥнээһин, “улугуруу” баар буолаары гыммыт дуу диэн дьиксиниэх санаа кэлэр. Оннук эрэ буолбатын, эрэлбитин сүтэрбэккэ, сайдыыга өрөйөн-чөрөйөн, дьулуһан иһиэххэ диэн баҕа санаабын этэбин.
Ким ДЬЯЧКОВСКАЙ-Анаарар, ХИФУ дассыана.
