“Сахамедиа” холдинг генеральнай дириэктэрэ Алексей Чертков, генеральнай дириэктэри солбуйааччы Афанасий Ноев «Саха сирэ» уонна «Якутия» хаһыаттарга тэриллибит сурутуу күнүн кэнниттэн, «Россия почтата» Саха сиринээҕи салаатыгар тиийэн салайааччы Андрей Сусловы кытта көрүстүлэр.
Маннааҕы почта салайааччытын Андрей Сусловы кытта көрсүһүүгэ Алексей Сергеевич “Саха сирэ” уонна “Якутия” хаһыаттарга кэлэр 2019 сылга сурутуу ыытылларынан, алтынньы 5 күнүгэр, Саха циркэтин киэҥ уораҕайыгар тэрээһин ыытыллыбытын сырдатта.
Бу далааһыннаах тэрээһиҥҥэ 900-кэ чугаһыыр киһи кэлбитин, ол да үрдүнэн баҕалаахтар билиэттэн маппыттарын, бу хаһыаты сөбүлээн ааҕааччылар элбэхтэрин туоһулуурун бэлиэтээтилэр. Ааҕааччылар бу киэһэ суруналыыстары кытта сэһэргэһэллэрин сэргэ, туһалаах маастар-кылаастарга астына-дуоһуйа сылдьыбыттарын, бэртээхэй кэнсиэри көрбүттэрин, ону таһынан сүүйүүлээх оонньууттан өттүк харалаах, илии тутуурдаах дьиэлээбиттэрин кэпсээтилэр. Маннык тэрээһин хаһыат үлэһиттэрин уонна ааҕааччылары ыкса ситимниирин ыйдылар. Сурутууга күүскэ үлэлэһэргэ кэпсэттилэр, илии тутустулар.
Сахамедиа» салалтатын кытта көрсөн баран, А.В.Суслов хаһыаттарга сурутуу сэргэхтик саҕаламмытын бэлиэтээтэ. Итиэннэ Нам, Горнай улуустарыгар «Почта России» Саха сиринээҕи салаатын тэрилтэтиттэн бэрэстэбиитэллэр тахсыһа сылдьаллара наадалааҕын, тыа сирин олохтоохторун көрсүһэн кэпсэтэр баҕалаахтарын биллэрдэ.
Сардаана БАСНАЕВА, “Саха сирэ” хаһыат, edersaas.ru