Саха сирин баһылыга Айсен Николаев кулун тутар 26 күнүгэр Көҥүл тустууга аан дойду кубогын тэрийэр кэмитиэтин түмүк мунньаҕын ыытта.
Дьокуускай куоракка Көҥүл тустууга аан дойду кубогын ыытар туһунан быһаарыы 2018 сыл ахсынньы 26 күнүгэр ылыныллыбыта. Өөрөспүүбүлүкэ Ил Дархана Айсен Николаев этии киллэриитинэн турнир саҕаланыа баара-суоҕа үс ый иннинэ.
“Кылгас болдьоххо биһиги норуоттар икки ардыларынааҕы бөдөҥ спортивнай күрэхтэһиини тэрээһин өттүнэн үрдүк таһымнаахтык ыытар кыхтанныбыт. Бочуоттаах ыалдьыттар – Тустуу аан дойдутааҕы түмсүүтүн бэрэсидьиэнэ Ненад Лалович, Арассыыйа спортивнай тустууга федерациятын бэрэсидьиэнэ Михаил Мамиашвили, турнир кыттыылаахтара, тириэньэрдэр, судьуйалар уонна ыалдьааччылар Дьокуускай куоракка аан дойду Кубогын ыытыы тэрээһинин үрдүктүк сыаналаатылар. Саха сирэ турнир бүттүүн историятыгар көҥүл тустууга аан дойду бастыҥ Кубогын ыыппыпытынан киэн туттуохтаахпыт”, — диэн бэлиэтээтэ Ил Дархан.
Аан дойду Кубога тыһыынчанан Саха сирин олохтооҕун түмтэ. UWW салалтата уонна аан дойду аҕыс тустууга державатын спортивнай дэлэгээссийэлэрэ Саха сирин олохтоохторо ыалдьытымсахтарын, түмсүүлээхтэрин бэлиэтээтилэр.
“Саха сирэ уонна Дьокуускай норуоттар икки ардыларынааҕы оҕо уонна устудьуоннар күрэхтэһиилэрин сэргэ спорт олимпийскай көрүҥнэригэр аан дойдутааҕы турнирдары үрдүк таһымнаахтык ыытар кыахтаахпытын дакаастаатыбыт. Бүгүн өрөспүүбүлүкэҕэ аан дойду Кубогын эрэ буолбакка, көҥүл тустууга аан дойду Чөмпүйэнээтин инфраструктураҕа кэккэ ирдэбиллэри, чуолаан, гостиница уонна тыраанспар өҥөлөрүгэр толордоххо ыытар кыах баар. Өрөспүүбүлүкэтээҕи уонна муниципальнай былаастар, спорт тэрилтэлэрэ, биисинэс түмсүүлэрэ бары бииргэ үлэлээтэхтэринэ, чугастааҕы кэмҥэ маннык улахан түһүлгэни ыытар миэстэнэн буолар кыахтаахпыт”, — диэтэ өрөспүүбүлүкэ баһылыга.
Саха сирин Ил Дархана Айсен Николаев, физическэй култуура уонна спорт миниистирэ Иннокентий Григорьев үөрүүлээх быһыыга-майгыга тэрийэр кэмитиэт чилиэннэригэр уонна Кубок спонсордарыгар бочуотунай грамоталары уонна махтал суруктары туттардылар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата