Былатыан Ойуунускай аатынан Саха тыйаатыра сыл аайы Кыайыы күнүгэр сэрии тиэмэтигэр аналлаах испэктээги көрдөрөр үтүө үгэстээх.
edersaas.ru
Онтон тыйаатыр быйылгы сезонугар Улуу кыайыы 77 сылыгар анаан ханнык испэктээги көрөөччүлэригэр бэлэмнээтэ? Нуучча суруйааччыта Борис Васильев «А зори здесь тихие…» сэһэнинэн турбут киинэни төһөлөөх киһи харах уулаах уйадыйа көрбүтэ буолуой? Аны Сахабыт тыйаатырын эдэр артыыстара «Сарсыарда. Уу чуумпуга…» диэн испэктээги туруоран эрэллэрин долгуйа күүппүппүт. Сэриигэ быстах дьылҕаламмыт кыргыттары сахалыы дыраамаҕа тыйаатырбыт бииртэн биир кэрэчээн артыыстара оонньуохтара өссө ордук кэрэхсэтэр.
Онон, тыйаатыр куорат олохтоохторун уонна ыалдьыттарын ыам ыйын 7 уонна 9 күннэригэр сэрии дырааматыгар ыҥырар.
Туруорааччы режиссер – Роман Дорофеев
Инсценировката уонна сахалыы тылбааһа — Павел Ченянов
Сыана худуоһунньуга – Михаил Егоров
Көстүүм худуоһунньуга – Сардана Федотова.
Испэктээк -– Саха тыйаатырын артыыһа Роман Дорофеев режиссер кууруһун бүтэрэригэр дипломнай үлэтэ. Кини сэрии, тыыл бэтэрээннэрин уонна саха дьонун иннигэр улахан эппиэтинэһи сүкпүтүттэн долгуйар. Ол эрэн, режиссер быһыытынан холонон көрүүгэ олус интэриэһинэй үлэ буоларын бэлиэтиир. Дьиҥэр, Улуу Кыайыы 75 сылыгар былааннаабыт бу үлэ биллэр төрүөтүнэн икки сылга көһөрүллүбүтэ.
Федот Евграфович Васковы АГИКИ 5 кууруһун устудьуона Роман Макаров (дипломнай үлэтигэр) оонньуур. Онон, режиссер Роман Дорофеев этэринэн, бу испэктээк артыыстарга да, туруорааччыларга да сонун хайысханы боруобалааһын курдук. Тоҕо диэтэххэ, Роман Макаров нууччалыы, онтон кыргыттар сахалыы тылынан оонньуохтара.
Надежда ЕГОРОВА, «Саха сирэ», edersaas.ru