Сүрүн Уопсастыба

Аҕыс улуус федеральнай таһымҥа Арктика зонатыгар киирдилэр

Ыам ыйын 13 күнүгэр РФ бэрэсидьиэнэ Владимир Путин «РФ Бэрэсидьиэнин 2014 c. 296 №-дээх Арктика зонатын сирин-уотун туһунан»  Ыйааҕар  уларытыылары киллэрэр туһунан» 220№-дээх  ыйаахха  илии баттаата.

edersaas.ru

Туһааннаах ыйаах быраап туһунан иһитиннэрии порталыгар тахсан, күүһүгэр киирдэ. Бу иннинэ федеральнай таһымҥа Саха сирин  биэс эрэ оройуона,  Аллайыаха, Анаабыр, Булуҥ, Аллараа Халыма уонна Усуйаана Арктика зонатыгар киирэллэрэ. Хотугу  эргимтэ эҥээр 8 улууһу Арктика зонатыгар киллэрии туһунан кэпсэтии  кэлиҥҥи сылларга утумнаахтык ыытыллыбытын түмүгэр биир тирээн турар боппуруос олохтоохтук быһаарылынна. Бу туһунан Ил Дархан Айсен Николаев Instagram социальнай тиһиккэ суруйан иһиттиннэрдэ. Онон РФ бэрэсидьиэнэ Владимир Путин саҥа ыйааҕынан  Абый, Дьааҥы, Үөһээ Халыма, Эдьигээн, Муома, Өлөөн, Орто Халыма уонна Эбээн Бытантай улуустара федеральнай таһымҥа Арктика зонатыгар киирдилэр.

Ил Дархан Айсен Николаев Саха сирин бары олохтооҕун аатыттан дойду бэрэсидьиэнигэр Владимир Путиҥҥа өйөбүлүн иһин истиҥ махталын тиэртэ уонна өрөспүүбүлүкэ салгыы сайдарыгар тустаах быһаарыы кэккэ түмүктээх буолуоҕар эрэнэрин биллэрдэ.

Елена ПОТОЦКАЯ, «Саха сирэ» хаһыат, edersaas.ru

Хаартыска  интэриниэттэн туһанылынна.

0
0

Добавить комментарий