Арассыыйа күнэ — дойду биир саамай эдэр судаарыстыбаннай бырааһынньыга. 1990 сыллаахха Сэбиэскэй Сойуус састаабыгар киирэр өрөспүүбүлүкэлэр бэйэлэрин суверенитеттарын туһунан быһаарыы ылынаннар, Арассыыйа бэйэтин судаарыстыбаннаһын бөҕөргөтөрө наада буолбута. Ол иһин ити сыл бэс ыйын 12 күнүгэр РСФСР норуодунай дьокутааттарын бастакы сийиэһэ Арассыыйа судаарыстыбаннай суверенитетын туһунан Декларацияны ылыммыта. Ити күнтэн Арассыыйа туспа судаарыстыба буолбута.
edersaas.ru
Ил Дархан Айсен Николаев Ленин болуоссатыгар ыытыллыбыт тэрээһиҥҥэ кыттыыны ылан, Дьокуускай куорат олохтоохторун бу бэлиэ күнүнэн эҕэрдэлээтэ.
“Бу сыллар тухары дойдубут уларыйыы-тэлэрийии нөҥүө ааста уонна салгыы иннин диэки сайдарыгар күүстээх буолла. Арассыыйа күнэ Арассыыйа көҥүлүн уонна тутулуга суоҕун, бэйэлэрин Ийэ дойдуларын бары бииргэ туппут уонна көмүскээбит норуоттар биир историческай дьылҕалаахтарын туоһулуур. Саха сирэ Арассыыйа биир быстыспат сорҕотунан буоларынан, дойдубут сайдыытыгар дьоһун кылаатын киллэрдэ”, — диэн Айсен Сергеевич эҕэрдэ тылыгар эбэн эттэ.
Бу күн Ленин болуоссатыгар үөрүүлээх быһыыга-майгыга Дьокуускай куорат оскуолаларын бастыҥ үөрэнээччилэригэр Арассыыйа Федерациятын гражданинын пааспара туттарылынна. Ол курдук, оҕолор олохторугар сүрүн докумуоннарын Ил Дархан Айсен Николаевтан туттулар.
edersaas.ru