Бүгүн киэһэ Өксөкүлээх Өлөксөй аатынан норуоттар доҕордоһууларын дьиэтигэр Донецкай уонна Луганскай Народнай Өрөспүүбүлүкэлэр олохтоохторун өйүүр аһымал кэнсиэр буолла.
Кэнсиэртэн киирбит үп бу икки өрөспүүбүлүкэ олохтоохторугар көмө быһыытынан ыытыллыаҕа.
Кэнсиэргэ ыччаттар хото кэлбиттэр. Максим Колесов М.К. Аммосов аатынан ХИФУ Горнай институтун 5-с кууруһун устудьуона. Кини Горнай улууһун Бэрдьигэстээҕиттэн сылдьар. Эдэр киһи устудьуоннар идэлээх сойуустарын бэрэссэдээтэлин бастакы солбуйааччыта, «Эдэр гвардия» хамсааһын көхтөөх чилиэнэ.
— 22 саастаахпын. Доруобуйабынан хааччахтаах буолан, аармыйаҕа барбатаҕым. Оҕо эрдэхпиттэн дойдум, өрөспүүбүлүкэм патриотабын. Оскуола кэнниттэн аармыйаҕа бара сатаабытым да, доруобуйабынан сыыйыллыбытым.
Кэнсиэргэ «Эдэр гвардия» хамсааһынтан 60-тан тахса устудьуон ДНР уонна ЛНР олохтоохторун өйүү кэллибит, — диэн санаатын үллэһиннэ эдэр киһи.
Оттон Азалия Потапова кэнсиэргэ биэс аймаҕын илдьэ кэлбит.
— Сэбиэскэй кэм оҕолоро, биһиги, кыра эрдэхпититтэн сомоҕолоһуу уонна норуоттар доҕордоһууларын тыыныгар иитиллибит дьоммут. Дэлэҕэ да, «пятнадцать республик — пятнадцать сестер» диэн ырыаҕа ылланарыныы, ханнык да бырааттыы өрөспүүбүлүкэҕэ тиийэр, бэйэбит төрөөбүт дойдубутугар сылдьар курдук көҥүллүк тыынар этибит. Онон бу аһымал кэнсиэргэ билиэт ылан, кыра да буоллар бэйэбит сэмэй кылааппытын киллэрдибит, — диэн Азалия Петровна санаатын тиэртэ.
Елена ПОТОЦКАЯ, «Саха сирэ» хаһыат.