Бэҕэһээ киин куоракка “Сахаагропродукт” кэпэрэтиип базатыгар Аһылык технологиятын киинэ аһылынна.
edersaas.ru.
Өссө икки сыллааҕыта Тыа хаһаайыстыбатын министиэристибэтигэр ааспыт сылларга бу министиэристибэҕэ астыыр-таҥастыыр бырамыысаланнас департаменын таһаарыылаахтык салайбыт, уопуттаах технолог Розаида Гудуева ас-үөл бородууксуйатын хаачыстыбатын үрдэтэргэ, аһылык куттала суох буолуутун хаачыйарга итиэннэ Таможня сойууһун тэхэньиичэскэй ирдэбиллэрин олоххо киллэрэргэ тирэх буолар, аныгы тиэхиньикэнэн сэбилэммит анал киини тэрийэр туһунан этиини оҥорбута. Ону министиэристибэ өйөөбүтүн түмүгэр Аһылык технологиятын киинэ баар буолла.
— Биһиги бэйэбит бородууксуйабытын өрөспүүбүлүкэ таһыгар эмиэ таһаарыахтаахпыт, — диир киин дириэктэрэ Розаида Петровна. – Ол эрээри, тэхэньиичэскэй докумуону, тэхэньиичэскэй усулуобуйаны ситэ оҥорбот буоллахха, ити кыайан ситиһилибэт. Дьэ ол иһин бу саҥа киин арылынна. Манна биири бэлиэтиибин, биһиги кэтиир эбэтэр ыстарааптыыр тэрилтэ буолбатахпыт, астыыр-таҥастыыр эйгэ ирдэбиллэригэр араас уларыйыылар киирэллэринэн сибээстээн, олохтоох хаһаайыстыбаларга көмөлөһөр сыаллаахпыт.
Билиҥҥитэ Уһук Илиҥҥэ соҕотох киин үс сүрүн салаалаах. Технология салаата өрөспүүбүлүкэ астыыр-таҥастыыр хаһаайыстыбаларга саҥа технологиялары киллэриигэ көмөнү оҥоруоҕа. Инженернэй-тэхэньиичэскэй салаа үлэтэ астыыр тэриллэри хааччыйыыга, хаһаайыстыбалар сакаастарынан бырайыактары оҥорууга туһуланыаҕа. Чинчийэр лаборатория аһылык бородууксуйатыгар анаалыс араас көрүҥүн оҥоруоҕа. Технолог идэтигэр үөрэнэр устудьуоннар манна практикаланыахтара, улуустартардааҕы астыыр кэмбинээттэр, сыахтар маастардара, технологтара идэлэрин үрдэтиэхтэрэ.
Раиса Сибирякова, «Саха сирэ» хаһыат, edersaas.ru.
Хаартыскаҕа Мария Васильевыа (ЯСИА) түһэриилэрэ.