Аһыҥа элбээтэ дуо?

Ааптар: 
Бөлөххө киир:

Саха сирин тыатын хаһаайыстыбатын үлэһиттэрэ, биирдиилээн моой отчуттар ходуһаларга оттуу киирэн эрэллэр. Ол эрээри сорох улуустарга аһыҥа элбээбитин туһунан сурахтар кэллилэр. Аһыҥа төһө элбээбитин туһунан биһиги тустаах салайааччылартан туоһуластыбыт. 

Агнесса Данилова, “Россельхозцентр” ФГБУ Саха сиринээҕи филиалын салайааччыта:

— Аһыҥа Чурапчы, Таатта, Уус Алдан, Мэҥэ Хаҥалас, Ньурба, Сунтаар, Өлүөхүмэ, Нам, Хаҥалас  улуустарын уонна Дьокуускай куорат ходуһаларыгар, сиригэр-уотугар баара билиннэ. 23,8 тыһ гектар сири чинчийдибит. Итинтэн 15,41 тыһ. гектарыгар аһыҥа баара билиннэ. 1 кв. м. 5-6 устуука личинканы буллахпытына уонна онтон элбэх буоллаҕына, химиичэскэй ньыманы туһаналларыгар сүбэлиибит. Биһиги тэрилтэбит улуустарга фитосанитарнай кэтээн көрүүнү (мониторинг) оҥорон, бу буортулаах үөн төһө элбээбитин быһаарар. Ол курдук, саас сири-буору хаһан кубышкатын булан, иһигэр төһө сымыыт баарын ааҕабыт. Сайыҥҥы өттүгэр аһыҥаны бэйэтин анал сочуогунан тутан ааҕыллар. Бу ходуһаларга буортулаах аһыҥаны утары улуустар эмтээһини ыыталлар. Холобур, Уус Алдан, Мэҥэ Хаҥалас, Чурапчы, Өлүөхүмэ, Ньурба эмтээбиттэрэ. Быйылгы дьылга 2698 гектар сири аһыҥаттан обработкалаатылар. Эрдэ уонна хойут эмтэннэҕинэ, көдьүүһэ мөлтөх буолар. Мэҥэ Хаҥалас уонна Уус Алдан улуустара аһыҥаны эмтээбиттэрэ түмүктээх буолбутун туһунан этэллэр. Уопсайынан ыллахха, баар бааһынаттан, ходуһаттан 15 бырыһыана көрүллүөхтээх этэ, ону оҥорботубут. Тоҕо диэтэххэ, бүддьүөтү таһынан үлэҕэ кыайан үп көрүллүбэтэҕэ. Ити үөһээ эппит 23,8 тыһ гектары судаарыстыба сорудаҕынан толорон олоробут. Онон инникитин өрөспүүбүлүкэ бүддьүөтүгэр аһыҥа эмигэр уонна фитосанитарнай мониторины ыытыыга эбии үп-харчы көрүллэрэ ирдэниллэр.

Иван Егоров, Ньурба улууһун тыатын хаһаайыстыбатын управлениетын начаалынньыга:

— Ньурба улууһугар аһыҥа Ньурбачаан, Сүлэ, Антоновка нэһилиэктэрин сиригэр-уотугар добуоччу баара билиннэ. Бэйэлэрин кыахтарынан эмтээн, төһө кыалларынан, аҕыйата сатыыллар. Нэһилиэктэр бэйэлэрин истэригэр ыксаллаах балаһыанньаны биллэрбиттэрэ.

Бэлэмнээтэ Женни Стрюкова

Хаартысканы: “Россельхозцентр” ФГБУ Саха сиринээҕи филиалыттан ыыттылар: 1. Мэҥэ Хаҥаластааҕы отдел сүрүн агронома Шестакова Туйаара фитосанитарнай мониторины ыытар. 2. Сочуокка киирбит аһыҥалар

+1
0
+1
0
+1
0
+1
0
+1
0
+1
0
+1
0