Култуура Сүрүн

А.Е. Кулаковскай-Өксөкүлээх Өлөксөй төрөөбүтэ 145 сылынан пааматынньыгар сибэкки дьөрбөтүн уурдулар

Бүгүн саха норуотун чулуу уола, айар тыл аҕата А.Е. Кулаковскай-Өксөкүлээх Өлөксөй төрөөбүтэ 145 сылын туолла. Бу күн өрөспүүбүлүкэ салалтатын, парламенын бэрэстэбиитэллэрэ, уопсастыбаннас, биир дойдулаахтара, сиэннэрэ, хос сиэннэрэ сирбэкки дьөрбөтүн уурдулар.  

Өксөкүлээх Өлөксөй сиэнэ, РФ уонна СӨ култууратын үтүөлээх үлэһитэ Раиса Кулаковская:

— А.Е. Кулаковскай сааһын тухары учууталлаабыта. Тааттаҕа, Бүлүүгэ, Бодойбоҕо, Хаҥаласка, куоракка учууталлаабыта, өрөспүүбүлүкэбитин салайыспыт, кинилэринэн киэн туттар бэртээхэй дьоммутун Исидор Бараховы, Степан Аржаковы, Степан Гоголевы, о.д.а.  иитэн таһаарбыта. Кини көннөрү ииппит буолбатах. Бу оҕолорго улахан үлэһит да буолбуттарын кэннэ ыска сыһыаннаһара. Исидор Бараховка кырамаатыка туһунан үлэтигэр сүбэлэһэн-амалаһан, көрдөһөн үлэтин утары ууммута. Саха сиригэр кини ханна баҕарар көҥүл сылдьарыгар пропуск биэрбитэ. Кини учууталлаабыт кэмнэрэ өрөспүүбүлүкэбит 100 сылыгар эмиэ улахан суолталаах эбит диэн үөрэбин. Ити туһунан мин 50 сыллааҕыта университеты бүтэрэрбэр дьупулуомум үлэтигэр суруйбут эбиппин. Ону бу күннэргэ ааҕан сөҕөн кэпсээн-сэһэн оҥосто сылдьабын. Оччотооҕу кини үөрэнээччилэрин илэ көрбүппүттэн олус үөрэбин. Дора Жирковаҕа, Муся Потаповаҕа Москваҕа тиийэн учууталларын туһунан туох санаалаахтарын суруйан ылбытым. Кини А. Пушкин “Няня”, “Буря” диэн хоһооннорун сахалыы тылбаастаан ааҕарыгар тиийэ өйдүүр уонна киэн туттар эбиттэр, — диэн бэлиэтээтэ.

Дьокуускай куорат баһылыга Евгений Григорьев: “Улахан убайбыт төрөөбүт күнүгэр маннык мустан ааһарбыт биһиэхэ, саха омугар дириҥ суолталаах. Омук — тыла баарын тухары кэхтибэт, охтубат. Биһиги маннык мустан, оҕолорбут кыттан, улуу дьоммутун өрө тута сырыттахпытына омук быһыытынан эстиэхпит суоҕа. Өксөкүлээх Өлөксөй кылгас да буоллар, билиҥҥи үйэҕэ суолталаах айымньылара, өтө көрүүлэрэ сөхтөрөр. Билигин дойдуга тыҥааһыннаах кэм. Омуктар маннык кэмҥэ бары бииргэ түмүстэхпитинэ, тутустахпытына сайдар кыахтаахпыт”, — диэн эттэ.

СӨ Ил Түмэнин хотугу төрүт олохтоох, аҕыйах ахсааннаах норуоттар боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева: “А.Е. Кулаковскай 110 сыллааҕыта “Саха интеллигенциятыгар” суруйбут суруга биһиги парламеммыт саамай элбэхтик ыытыллар мунньаҕын саалатын аанын иннигэр улахан ыйынньык уонна сирдьит буолан турар. Норуоттан талыллыбыт дьокутааттар онно кэлэн 110 сыллааҕыта суруллубут этиилэри дойдуларын, норуоттарын туһугар тахсыылаахтык, бэриниилээхтик үлэлиэхтээхпит диэн санааны ылыналлар.

Дойдубутугар билигин тыҥааһыннаах кэм. Бу кэмҥэ дойдубут бэрэсидьиэнин В.В. Путин тула түмсэн, Сахабыт сирэ, дойдубут инникигэ кыахтаах буолуутун бэйэбитигэр ылыныахтаахпыт диэн бу сурук эмиэ этэр. Ханнык да түгэҥҥэ, ханнык да кэмҥэ бу сурук бары ыйытыыга хоруйдары биэрэр”, — диэн эттэ.

Саха сирин суруйааччыларын сойууһун бэрэссэдээтэлин солбуйааччы Гаврил Андросов: “Кэлин Өксөкүлээҕи сорохтор литэрэтиирэҕэ, тыл билимигэр эрэ сыһыаннаах курдук этэллэр. Өксөкүлээх Өлөксөй саха култууратыгар бүтүннүүтүгэр аныгылыы сайдыы суолун арыйбыт, күн бүгүҥҥү биһиги өйбүт-санаабыт, тылбыт-өспүт, култуурабыт, бу маннык чаҕылхай таас куораттарга олорор олохпутун түстээбит, онно ааны арыйбыт саха култууратын сүдү инникини өтө көрбүт киһи буолар. Кини аата тыл билимин, искусство эрэ иһинэн буолбакка, бүтүн омук, нация, өрөспүүбүлүкэ иһинэн сыаналаныахтаах диэн өйдүүбүн уонна оннук ылынаргытыгар ыҥырабын” – диэн эттэ.

Бэлиэ тэрээһиҥҥэ Дьокуускайдааҕы педагогическай кэллиэс иһинэн үлэлиир алын оскуола 1 “А” кылааһын үөрэнээччитэ Дамир Хазанкович “Байанай алгыһыттан”, СӨ норуоттарын ыччатын ассамблеятын чилиэнэ Фаридун Хотамов “Ортоку олук алгыһыттан” быһа тардан аахтылар.

Людмила ПОПОВА, “Саха сирэ” хаһыат, edersaas.ru

Хаартыска: Мария ВАСИЛЬЕВА (СИА).

 

0
0
Telegram Whatsapp