Кыра да иирсээн уокка арыы кутар курдук күөдьүйэн-күүдэпчилэнэн, ыар буруйу оҥорууга тиэрдиэн сөп. Мииринэйгэ биир ыалга оннук алдьархай бүрүүкээн, суут бириигэбэрэ тахсыбыт.
Суут быһаарбытынан, бу дьыл тохсунньу ыйыгар 33 саастаах киһи аҕатынаан кыыһырсыбыттар. Аҕата кыра кыыскын сыыһа иитэҕин диэн уолун сэмэлээбитигэр, устунан охсуһан бурҕаһан турбуттар.
Онуоха эдэр киһи быһаҕы ылан, аҕатын аҕыстан итэҕэһэ суохтук анньан, миэстэтигэр өлөрбүт.
Суут мунньаҕар буруйун сороҕун эрэ билиммит, «бэйэбин көмүскэммитим» диэн көрдөрүү биэрбит.
Ол эрэн, көмүскэнэн буолбакка, соруйан өлөрбүтэ суукка дакаастанан, суут кинини 8 сылга кытаанах эрэсиимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн