Дьиэҕэ олорор аҕам саастаахтар мантан кыһын чуҥкуйуохтара суоҕа дииллэр. «Үһүс саас оскуолата» кинилэргэ анаан куйаар ситиминэн бырагыраама бэлэмнээбит.
«Үһүс саас оскуолата» уопсастыбаннай түмсүү күһүҥҥү-кыһыҥҥы кэмнэргэ аҕам саастаах дьон олоҕун-дьаһаҕын хайдах сэргэхситэрин былааннаата диэн sakha.gov.ru суруйар. Ол курдук, ырыаҕа, өйү-санааны бигэ туруктуурга, үлэнэн терапияҕа, отунан чэбдигирдиниигэ, доруобуйаны көрүнүүгэ, о.д.а. араас туһалаах тиэмэҕэ анаан онлайн-көрсүһүүлэри, маастар кылаастары, анал лиэксийэлэри толору былааннаабыттар. Бу тэрээһиннэргэ норуот маастардара, артыыстар, музейдар, бибилэтиэкэлэр үлэһиттэрэ, биллэр мелодистар, быраастар, уо.д.а. кытталлара болҕомтону номнуо тардыбыт. Кинилэр вебинардар, онлайн-сэминээрдэр көмөлөрүнэн, үөрүйэхтэрин атастаһыахтара, санааларын үллэстиэхтэрэ диэн иһитиннэрэллэр.
Бары дьарыктар ыраахтан куйаар ситиминэн ыытыллаллар. Маныаха аҕам саастаахтары интэриниэтинэн туһанарга үөрэтэллэр-такайаллар. Эбээлэр, эһээлэр электроннай почтанан туһаныахтара, социальнай ситимнэринэн сэһэргэһиэхтэрэ, Zoom дьарыктарга кыттыахтара, YouTubе туһаныахтара, wi-fi холбонор буолуохтара дииллэр.
Маннык дьарыктар баар буоллахтарына, аҕам саастаахтар хоруона хамсыгын кэмигэр, дьиэҕэ олорон аралдьыйыахтара, соҕотохсуйуохтара суоҕа диэн бүк эрэнэллэр. Онон сэҥээрбиттэр 89142307071 төлөпүөҥҥэ эрийэн сурутуохтарын сөп.
+1
+1
+1
+1
+1
+1
+1