Намҥа, сыллата тиһигин быспакка ыытыллар өрөспүүбүлүкэтээҕи «Радуга — 2019» баальнай үҥкүү күрэхтэһиитигэр, үгүс кэлэктииптэр ситиһиилэннибит.
Манна Дьокуускай куораттан «Мозаика», «Золотые погоны», «Кэрэ эйгэ», Уус Алдан улууһуттан Бороҕон, Бэйдиҥэ, Мэҥэ Хаҥалас улууһуттан Аллараа Бэстээх, Майа, Нам улууһуттан Хамаҕатта, Аппааны уонна Нам, Амматтан, Хаҥаластан үҥкүү күүстээх хамаандалара кыттан, табыллан күрэхтэстилэр.
Холобур, биһиги, Майаттан «Кыталык» киинин иһинэн тэриллибит баальнай үҥкүү аҕам саастаах кэлэктиибэ, «Баальнай үҥкүү ансаамбылыгар» бастакы миэстэни ыллыбыт. Биирдиилээн пааранан күрэскэ 9 паара кыттан, 5 паара бастакыны, 2 паара иккис миэстэни ылан, үөрэн-көтөн, бары кыайыы өрөгөйүн өрө тутан кэллибит.
Бу куонкуруһу Нам улууһугар тэрийэн ыыппыт «Мозаика» ансаамбыл салайааччытыгар Михаил Захарович Сивцевкэ, «Кыталык» дириэктэригэр Александра Гаврильевна Винокуроваҕа, «Кыталык» норуодунай ансаамбыл уус-уран салайааччытыгар Василий Павлович Винокуровка, хореограф Илья Валентинович Крыловка барҕа махталбытын тиэрдэбит.
Людмила ПИПОВАРОВА,
баальнай үҥкүүгэ аҕам саастаахтар бөлөхтөрүн ыстаарыстата, өрөспүүбүлүкэтээҕи «Эйгэ» уопсастыбаннай тэрилтэ чилиэнэ.
Мэҥэ Хаҥалас, Майа.