Аҕам саастаах дьоҥҥо бэйэни хааччахтаныы эрэсиимэ уһулунна

Бөлөххө киир:

Саха сиригэр кууһунан атыылыыр баазаларга дезинфекцияны ыытыы уонна коронавируснай инфекцияны утары быһыыны ылбатах аҕам саастаах дьон бэйэни хааччахтанан олорор булгуччулаах эрэсиимнэрэ тохтоото.

Өрөспүүбүлүкэҕэ санитарнай-эпидемиологическай балаһыанньа тупсубутунан, коронавируһунан ыалдьыы аҕыйаан иһэринэн, урут ылыллыбыт хааччахтыыр миэрэлэр сорохторо уһуллаллар. Ил Дархан Айсен Николаев 2022 сыл кулун тутар 31 күнүнээҕи ыйааҕынан, кууһунан атыылыыр тэрилтэлэргэ хас баскыһыанньа аайы сарсыарда 8 чаастан күнүс 12 чааска диэри дезинфекцияны ыытар ирдэбил уһулунна. Бу миэрэ сааҥсыйа кэмигэр нэһилиэнньэ бородууктанан хааччыллыытын хааччахтаабат туһуттан ылыллар.

Ону тэҥэ, быһыыны ылбатах 60-тан аҕа саастаах дьон уонна олоҕурбут ыарыылаах үлэлээбэт дьон бэйэни хааччахтанан олоруулара, дьиэттэн үлэлииллэрэ булгуччулаах буолбат.

Ол эрээри, Саха сиригэр коронавирус тарҕаныытынан сибээстээн, үрдүк бэлэмнээх эрэсиим оннунан хаалар. Маасканы кэтии, тырааныспары уонна дьон мустар сирдэрин дезинфекциялааһын ирдэбиллэрэ тутуһуллуохтаахтар. Дезинфекция кэмигэр тэрилтэ сабыллыахтаах диэн ирдэбил тохтуур, бэйэлэрэ үлэлэригэр мэһэйдэппэккэ эрэ, сууйар-сотор үлэни ыытыахтаахтар.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0