Аҕа күнүн көрсө “Алмаасэргиэнбаан” уонна кини хос хампаанньалара «АЭБ-Партнер», «СЭЙБИЭМ» “Үтүө дьыала аукционун” тэрийэн ыыппыттара. Онно киирбит харчынан дьиэҕэ-уокка туттуллар уонна цифровой тиэхиникэни, ас-үөл бородууктатын атыылаһан, аҥаардас аҕаларга биэрдилэр.
Баан үлэһиттэрэ маннык аахсыйаны тута өйөөн, баҕа өттүлэринэн харчы хомуйбуттара. Ону ааһан, “Үтүө дьыала аукционун” ый аайы ыытарга быһаардылар. Онон баан үлэһиттэриттэн волонтердар талыллан, үбү-харчыны хомуйан, ый аайы көмөҕө наадыйар дьоҥҥо түҥэтиэхтэрэ.
— Үтүө дьулуур уонна волонтер сылыгар туора турбакка, араас аһымал аахсыйаларга кыттыынан эрэ муҥурдаммакка, бэйэбит кыахпытынан маннык аукциону ыытарга быһаарыммыппыт. Урут да ыарахан балаһыанньаҕа түбэспиттэргэ көмөлөһөр этибит. Биһиги күүспүтүн холбоотохпутуна, үтүөнү оҥорортон туора турбатахпытына эрэ олорор куораппытын, өрөспүүбүлүкэбитин тупсарар, сайыннарар кыахтаахпыт. Хас биирдиибит кими да кэтэспэккэ, онуоха холобур буолуохтаах, — диэн “Алмаасэргиэнбаан” уопсастыбаннаһы кытары сибээһин сулууспатыгар корпоративнай-социальнай эппиэтинэс хайысхатын салайааччы Наталья Миронова этэр.
Чахчы да, оннук. Хас биирдии киһи ис сүрэҕиттэн кимиэхэ эрэ көмөлөһөр, бэйэтин баҕа санаатынан туох эрэ үчүгэйи оҥорорго дьулуһар буоллаҕына, бу сиргэ үтүө санаа элбиэ, олохпут тупсуо этэ.
Ангелина ВАСИЛЬЕВА, “Саха сирэ” хаһыат, edersaas.ru