— Ким кэллээ? (Эмээхсин аан тыаһыырын истэн ыйытар)
— Мин, эбээ…
— Ньургуҥҥун дуо?
— Мин, аһаа…
— Ээ, аһаабытым. Оҕом аһаа диэбитинэн киирдэ ээ, кыһаллаахтыыр буоллаҕа. Сыгынньахтанныҥ дуо? Хата, киирэн бэйэҥ аһаа, алаадьы буһарбытым.
— Сөп, аһаа.
— Аһаабытым диибин ээ, киинэ көрөбүн, бэйэҥ бэлэмнэнэн аһаа.
— Сөп, аһаа, эбээ.
— Туй сиэ, кэлиилии кэбэ турдаҕа үһү, аһаа-бы-тыым!
— Сөп аһаа, диибин ээ, эбээ.
— Бай! Ити дии! Кулгааҕар күнү быһа наушниктаах сылдьан, букатын дьүлэй буолаары гыммыт ээ. Нокоо, наушниккын уһул эрэ!
— Сөп, аһаа!
— Хайдах баҕайыный? (туран кухняҕа киирэр).
— Тоойуом, мин аһаабытым, аны хойутуу аһыам, билигин киинэ көрө олоробун.
— Эбээ, сөп аһаа. (Эмээхсин сиэнигэр чугаһаан кулгааҕын тутан көрөр, онтон төбөтүн тутар…)
— Тоойуом, төбөҥ ыалдьыбат дуо?
— Ыалдьыбат, аһаа.
— Мин тото аһаабытым ээ… (уол кулгааҕар сибигинэйэр)
— Эбээ, хайдах буоллуҥ? (ыгылыйар). Аһаама ээ, хайдах биири мээрилиигин?
— … О..о.. ооттон бэйэҥ “аһаа” дии-дии мээрилиигин ээ, мин үһү дуо?
— Сөп аһаа, мин да буолуум, бар киинэҕин көр! Сүгүн аһат.
— Бардыым-бардым, минньигэстик аһаа, тоойуом!
— Сөп аһаа!
Эмээхсин барыахча буолан атыллаан иһэн тохтуу түһэр…
— Ити баар… (ботугуруур) аһаа диир… эмиэ да киинэҕин көр диир… (турар).
— Чэ, аһыым даҕаны… (остуолга тиийэн, олоппоско олорор).
— Хайа эбээ, аһаары гынныҥ дуо?
— Оттон аһаа да аһаа диэҥҥин аһаабат да киһини аһатыах курдуккун дии…
— Мин дуо? (соһуйар). Аһаа дии иликпин…
— Бай! Аны мэлдьэһэн эрэр дуу? Маарыын ааны аһан киириэххиттэн “аһаа да аһаа” — диигин дии, аһаабытым диирим үрдүнэн.
— Эбээ, аһаа диэбэтэҕим ээ, эн аһыыргын аһаабаккын бэйэҥ билэр буоллаҕыҥ, хайаан ону мин дьаһайыахпыный?
— Чэ, оччоҕо, мин хайдах эрэ буолбуппун… сытыыһыкпын… (хос диэки хаамар).
— Сөп эбээ сыт, бастаан дабылыанньаҕын мээрэйдэн. Эбэм барахсан кырдьаары гыммыт дуу?
edersaas.ru саайтка анаан Наталья МОРДОВСКАЯ – Уйан Кут.
Хартыына: detsad12.yaguo.ru