Нам улууһугар, Хамаҕаттаҕа, Култуура дьиэтин сыанатыгар быйылгы сылга түөрт улахан суолталаах тэрээһин эмбилиэмэтэ ыйанан турар.
Елена ПОТОЦКАЯ, «Саха сирэ» хаһыат, https://edersaas.ru
Арассыыйаҕа — Экология сыла, Саха сиригэр — Ыччат сыла, Нам улууһугар — Максим Аммосов төрөөбүтэ 120 сыла уонна Хамаҕатта нэһилиэгэр — Аҕа сыла.
— Сыл саҥатыгар уопсастыбаннай түмсүүлэр мустан, быйылгы сылбыт былаанын сүбэлэспиппит. Манна 700-кэҕэ чугаһыыр аҕа олорорун уонна быйыл муус устарга өрөспүүбүлүкэҕэ Аҕалар II сийиэстэрэ ыытылларын учуоттаан, нэһилиэкпитигэр Аҕа сылын биллэрэргэ санаммыппыт, — диэн кэпсиир «Эркин» эр дьон сэбиэтин салайааччы Руслан Захаров.
Аҕа сылыгар хамаҕатталар ыйдарынан туох үлэни ыыталларын былааннаабыттар. Сааскы ыйдарга эр дьон оту-маһы тиэйэр кэмнэрэ буолан, сүрүннээн, субуотунньуктары ыытарга сыал-сорук туруоруммуттар. Онтон улахан уу кэлэн ааһыыта, сүөһү киирэр-тахсар күрүөлэрин өрөмүөннүөхтэрэ. Сайын оттооһуҥҥа эр дьону өйүүр, көҕүлүүр сыалтан күүлэйдэри тэрийиэхтэрэ. Кэрэхсэбиллээҕэ, бары тэрээһиннэргэ аҕалар төрөппүт уолаттарын кытта кыттыахтаахтар.
Хамаҕатталар Аҕа сылын эмбилиэмэтин оҥорон, тэрээһин статуһун өссө үрдэттилэр.
— Бэлиэ ис хоһооно дириҥ суолталаах — аҕа уолун сүгэн турар. Ыраахтан көрдөххө, бу ойуу сэргэ курдук көстөр. Саһархай өҥ — чаҕылхай күнү, халлаан күөх — ыраас эйэлээх халлааны, от күөҕэ — өлгөм, уйгулаах олоҕу туоһулууллар. Аҕа сылыгар маннык ис хоһоонноох бэлиэ биһигини арчылыыр эрэ буолбакка, саҥаны, үйэлээҕи оҥорорго түстүүр, — диэн Руслан Захаров санаатын үллэстэр.
Елена ПОТОЦКАЯ, «Саха сирэ» хаһыат, https://edersaas.ru