Өрөспүүбүлүкэ аҕаларын II сийиэһин пленарнай мунньаҕар кыттаары, бу сарсыарда Москваттан Арассыыйатааҕы «Аҕалар сойуустара» уопсастыбаннай тэрилтэ толорооччу дириэктэрэ Юрий Соленов көтөн кэллэ.
Елена ПОТОЦКАЯ, «Саха сирэ» хаһыат, edersaas.ru
Кинини «СӨ Аҕалар лигалара» уопсастыбаннай тэрилтэ салайааччыта Айхал Габышев көрүстэ.
Юрий Соленов бэлиэтээбитинэн, бүгүҥҥү күҥҥэ дойдуга аҕа оруолун уонна аптарытыатын үрдэтэр сорук турар. Ол инниттэн 2016 с. ыам ыйын 31 күнүгэр Арассыыйаҕа Аҕа сойууһа тэриллибитэ.
— Саха сиригэр Аҕа күнэ, Булчут күнэ уонна Уол оҕо күнэ диэн бэлиэтэнэр анал күннэр бааллар. Бу өрөспүүбүлүкэ салалтата аҕа оруолун үрдэтиигэ суолталаах үлэни ыытарын бэлиэтэ. Онон Саха сирин аҕаларын сийиэстэрин дэлэгээттэрэ, аны, Арассыыйа таһымыгар Аҕа күнүн туруорсалларын тус бэйэм өйүүбүн. Бу дириҥ ис хоһоонноох тэрээһин аҕалар хамсааһыннарыгар улахан төһүү күүһүнэн буолуо диэн эрэнэн туран, үлэ үөрүйэҕин анаан атастаһа кэллим, — диэтэ «Аҕалар сойуустара» уопсастыбаннай тэрилтэ толорооччу дириэктэрэ Юрий Соленов.
Онон өрөспүүбүлүкэ аҕаларын II сийиэһэ Арассыыйа таһымнанна. Бүгүн аҕалар сийиэстэрин пленарнай мунньаҕар сылдьан баран, ыалдьыт Юрий Соленов өрөспүүбүлүкэ салалтатын кытта көрсүөҕэ.
Елена ПОТОЦКАЯ, «Саха сирэ» хаһыат, edersaas.ru