Горнай улууһун Орто Сурт нэһилиэгэр өрөспүүбүлүкэтээҕи таһымнаах “Аҕа кыыһыныын” куонкурус буолан ааста.
edersaas.ru
Куонкурус ирдэбилинэн кыыс эрэ оҕолоох аҕалар кыттыахтаахтар этэ. Суолталаах тэрээһиҥҥэ Бэрдьигэстээхтэн — Максимовтар, Атамайтан – Аввакумовтар, Маҥаныттан — Алексеевтар, Варламовтар, Бүлүү улууһун Чинэкэтиттэн — Орлосовтар, Мытаахтан — Егоровтар дьиэ кэргэттэрэ кыттыыны ыллылар. Бырайыак ааптара — 4 кыыс оҕолоох ыал аҕа баһылыга Семён Никифоров.
Куонкурус кыттыылаахтара бэрт интэриэһинэй түһүмэхтэргэ ким туох кыахтааҕынан кытынна.
Ол курдук, дьиэ кэргэттэр дьарыктаах буолуу, эбии дохуоту киллэрии, иитии үгэстэрэ курдук бырайыактары көмүскээтилэр. Холобур, кыһыҥҥы тэпилииссэни көрүү-харайыы, куруолугу иитии, ынах-сылгы сүөһү иитиитин курдук бырайыактар интэриэһи тартылар.
Кыргыттары иитэр аҕалар “төгүрүк остуолга” дьиэ кэргэҥҥэ уонна уопсастыбаҕа аҕа оруолун, оҕону иитиигэ кэскиллээх тосхоллору ырыттылар. Горнай улууһун дьиэ кэргэҥҥэ уонна ыччакка психологическай көмөнү оҥорор киин салайааччыта Сахаайа Платонова кыыс оҕону иитиигэ лиэксийэ аахта. Ол кэнниттэн күүтүүлээх куонкурус дьэ саҕаланна. Аҕа уонна кыыс көхтөөхтүк бэйэни билиһиннэрдилэр, талааннарын арыйдылар, «Биһиги бииргэ» диэн биир истииллээх таҥаһы таҥнан хаамтылар. Түмүккэ дьүүллүүр сүбэ быһаарыытынан «Бастыҥ бырайыак» номинацияҕа Виолетта уонна Федор Максимовтар дьиэ кэргэттэрэ (Бэрдьигэстээх), «Бастыҥ хаһаайын» — Сайаана уонна Афанасий Алексеевтар (Маҥаны), “Бастыҥ талаан” — Аина уонна Петр Варламовтар (Маҥаны), «Истиҥ сыһыан» номинацияларга Алгыстаана уонна Владимир Егоровтар (Мытаах) тигистилэр.
Оттон икки бастыҥ дьиэ кэргэн — Света уонна Василий Орлосовтар (Чинэкэ) 10 тыһ. солк. сэртипикээтинэн, Альберт Аввакумов (Атамай) МР-156 саанан («Аартык» аҕалар түмсүүлэриттэн) уонна кини кыыһа Далаана бырайыак ааптара Семён Никифоровтан — 5 тыһ. солк. уу харчынан бэлиэтэннилэр.
Ити курдук, нэһилиэк олохтоохторо бэрт интэриэһинэй тэрээһинтэн өрө көтөҕүллэн, үөрэн-көтөн тарҕастыбыт.
Анастасия МАКСИМОВА,
Горнай улууһа,
Орто-Сурт нэһилиэгэ.
“Саха сирэ” хаһыат, edersaas.ru