Муус устар 9 күнүгэр 11-с төгүл ыытыллар өрөспүүбүлүкэтээҕи “Аҕа күрэҕэ” түмүктэннэ. Мэҥэ Хаҥалас Тиэлигитигэр ыытыллыбыт күрэхтэһиигэ 18 улуустан талыллан кэлбит 21 хамаанда күөн көрүстэ.
Бу күрэхтэһиигэ кыттан, улуус чиэһин көмүскүүр туһугар быйыл сүүстэн тахса дьиэ кэргэн киирсибит. Онон интэриэс сылтан сыл улаатан иһэр. Сорох аҕалар хас да сылы быһа үөрүйэхтэрин чочуйан, анаан эрчиллэн, таһымнарын үрдэтэн, ох курдук оҥостон кэлэллэр.
Аҕалар уонна уолаттар булт биатлонугар, остуолбаҕа ыттыыга, ойбону алларыыга, бэрэбинэни суорууга, мас хайытарга, бэрэбинэни эрбииргэ күрэхтэстилэр. Күрэхтэһиилэр тыҥааһыннаахтык бардылар, бүтэһиккэ диэри ким кыайара биллибэт этэ. Алҕас сыыһа тутуннуҥ да, мэлийэҕин.
Түһүмэхтэринэн кыайыыны ситистилэр:
“Бэйэни билиһиннэрии” — Чупровтар (Таатта);
“Булт биатлона” — Кривошапкиннар (Чурапчы);
“Остуолбаҕа ыттыы” — Федоровтар (Мэҥэ Хаҥалас);
“Ойбону алларыы” — Чупровтар (Таатта);
— “Бэрэбинэни суоруу” — Трофимовтар (Уус Маайа);
— “Маһы хайытыы” — Чупровтар (Таатта);
— “Бэрэбинэни эрбээһин” — Птицыннар (Дьокуускай).
Үһүс миэстэни Чурапчыттан Яков Николаевич уонна Михаил Кривошапкиннар ылан, Мэҥэ Хаҥалас улууһун баһылыга Н.П. Старостинтан убаһа бирииһи туттулар. Иккис миэстэни Тааттаттан Петр Романович уонна Арсен ылан, матассыыкыл бирииһинэн наҕараадаланнылар.
Оттон “Аҕа күрэҕэ” ХХI өрөспүүбүлүкэтээҕи күрэс кыайыылааҕынан Чурапчыттан Семен Семенович уонна Владислав Макаровтар таҕыстылар. СӨ үлэҕэ, социальнай сайдыыга миниистирин солбуйааччы Афанасий Постников кыайыылаах кубогун уонна сүрүн бирииһи – квадроциклы туттарда.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru