Аҕа — дьиэ кэргэн аҕа баһылыга. Дьиэ кэргэн — уопсастыба уонна судаарыстыба бигэ тирэҕэ.
edersaas.ru, Айхал Габышев
1999 с. биһиги өрөспүүбүлүкэбитигэр муус устар бастакы өрөбүлэ Аҕа күнүнэн биллэриллибитэ. Бу мантан ыла саха уопсастыбатыгар киэҥ далааһыннаах үлэ сөптөөхтүк уонна кэмигэр тэриллибитэ. «Лига отцов» уопсастыбаннай түмсүү тэриллэн, билигин таһаарыылаахтык үлэлиир. Хас биирдии нэһилиэккэ, улууска эмиэ маннык түмсүүлэр эр дьону мунньан, сырдыкка, кэрэҕэ, дьиэ кэргэн бөҕөргүүрүгэр утумнаах үлэни ыыталлар.
Биллэн турар, элбэх нэһилиэнньэлээх судаарыстыба күүстээх, социальнай-экономическай өттүнэн сайдыылаах буолар. Хас биирдии саха ыала ортотунан биэс оҕолоох буолуохтаах. Соторутааҕыта СӨ баһылыга А.С.Николаев элбэх оҕолоох ыалларга судаарыстыба өттүттэн көмө оҥорор туһунан ыйаах таһаарбыта.
Биһиги “Лига отцов” уопсастыбаннай түмсүүбүт көмөтүнэн аҕа оруола уопсастыбаҕа үрдээтэ. Араас хайысхалаах тэрээһиннэр ыытыллар буолуллар. Ол курдук, Аҕа күрэҕэ, аҕалар уонна уолаттар күрэхтэһиилэрэ, Уол оҕо күнэ уонна да атыттар. Эркин курдук эрэнэр эр дьоммут түмсүүлээх, олохторугар чопчу сыаллаах-соруктаах, дьиэ-кэргэн иннигэр эппиэтинэстээх буоллулар.
Инникитин даҕаны биһиги ыытар үлэбит көхтөөхтүк салҕанан бара туруоҕа.
Аламаҕай аҕаларбытын, эйэҕэс эһээлэрбитин Аҕа күнүнэн ис-сүрэхпиттэн эҕэрдэлиибин.
Олоххутугар үлэни өрө тутуҥ, дьиэ кэргэҥҥитигэр эрэллээх эркин буолуҥ! Ил-эйэ туругурдун. Бары биир санаанан салайтаран сомоҕолоох буолуоҕуҥ!
Аҕалар өрөспүүбүлүкэтээҕи түмсүүлэрин салайааччыта Айхал Габышев.