“Аһаҕас уопут”. Өрөспүүбүлүкэ ыччатыгар саҥа саҕахтар

Бөлөххө киир:

Кулун тутар 27 күнүгэр Саха Өрөспүүбүлүкэтигэр Сомоҕолоһуу сылыгар анаммыт Саха Өрөспүүбүлүкэтин Ыччат бырабыыталыстыбатын “Аһаҕас уопут” бырайыага саҕаланна. Бу бырайыакка олоҕуран 18-н 35 диэри саастаах эдэр ыччат министиэристибэлэргэ уонна судаарыстыбаннай тэрилтэлэргэ стажировканы барыаҕа.

edersaas.ru

“Биһиги бу бырайыагы ыччакка идэлэригэр уопут ылалларыгар көмөлөһөр туһугар оҥордубут, ону тэҥэ кинилэр министиэристибэ үлэтин “ис өттүттэн” билэллэрин уонна үлэлиир салааларын сайыннарыыга этии киллэрэллэрин курдук оҥордубут«, — диэн Ыччат бырабыыталыстыбатын  чилиэннэрэ  этэллэр.

Стажировканы 18-с сааһыттан 35 диэри саастаах, куонкуруһу ааспыт киһи барыан сөп. Кулун тутар 27 күнүттэн СӨ Экологияҕа, айылҕаны туһаныыга уонна ойуур хаһаайыстыбатын министиэристибэтигэр, СӨ Ыччат дьыалаларыгар уонна социальнай коммуникацияларга министиэристибэтигэр уонна СӨ Ил Дарханын иһинэн Архитектураҕа уонна тутууга управлениетыгар стажировканы барарга анкетаны ылыыны биллэрдилэр. Үөрэниэн баҕалаахтар  molprav.sakha.gov.ru. саайтка киирэн, усулуобуйаны билсиҥ.

Бырайыак салайааччыта, Саха сирин Ыччат бырабыыталыстыбатын бэрэссэдээтэлин бастакы солбуйааччы  Василина Лукина Ыччат бырабыыталыстыбатын чилиэннэрин стажировкаларын тэрийии уопута баарын холобурдаата. Ол курдук, 2018 сыллаахха ыччат структуратын активистара Арассыыйа Федерациятын Уһук Илини сайыннарыыга министиэристибэтигэр (Хабаровскай), Киһи хапытаалын сайыннарыы агентствотыгар (Владивосток), Стратегическай көҕүлээһиннэр агентстволарыгар (Владивосток), ону тэҥэ Москваҕа Инновационнай сайдыы министиэристибэтигэр үөрэммиттэрэ.

Бу үөрүйэҕи туһанан Ыччат бырабыыталыстыбатын хамаандата ыччат ситэриилээх былаас уорганнарыгар уонна биэдэмистибэлэргэ стажировканы барыыларыгар методическай сүбэни бэлэмнээбиттэрэ.  Бу сүбэлэри Саха Өрөспүүбүлүкэтин Ил Дарханын уонна бырабыыталыстыбатын дьаһалтатын салайааччытын бастакы солбуйааччы Павел Иванов өйөөбүтэ уонна өрөспүүбүлүкэ бары министиэристибэлэригэр үлэлэригэр туһаналларыгар ыыппыттара.

Биһ. корр., edersaas.ru

+1
0
+1
0
+1
0
+1
0
+1
0
+1
0
+1
0