Кулун тутар 19 күнүгэр 11 чаастан Ил Түмэн “Аһаҕас парламент” дискуссионнай былаһаакката үлэтин саҕалаата. Тэрээһин өрөспүүбүлүкэҕэ биллэриллибит Доруобуйа сылыгар уонна РФ Конституциятыгар мэдиссиинэ көмөтүн хаачыстыбатыгар, дьоҥҥо тиийимтиэ, табыгастаах буоларын хааччыйыыга уларытыылары киллэриигэ ананар.
Дискуссионнай былаһааккаҕа мэдиссиинэ көмөтүн хаачыстыбатын, дьоҥҥо тиийимтиэ буоларын хааччыйыы кыһалҕаларын ырытыстылар. Сокуоҥҥа уларыйыылар киирдэхтэринэ, дьоҥҥо-сэргэҕэ ол хайдах дьайыай? Нуорма-быраап, каадырынан хааччыллыы, мэдиссиинэ үлэһиттэрин социальнай өйөбүлэ, үлэ төлөбүрэ, цифровой мэдиссиинэни сайыннарыы, о.д.а. боппуруостары көрдүлэр.
Манна Ил Түмэн дьокутааттарын сэргэ, доруобуйа харыстабылын исписэлиистэрэ, салайааччылара, былаас уорганнарын бэрэстэбиитэллэрэ, эспиэрдэр, суруналыыстар, о.д.а. кыттыыны ылаллар. “Сахамедиа” холдинг “ютуб” ханаалыгар быһа эпииринэн көстө турар.
Ангелина Васильева, “Саха сирэ” хаһыат, edersaas.ru