Дьокуускайга Олоҥхо тыйаатыра үлэтин 13-с сезонун аһаҕас халлаан анныгар испэктээк көрдөрүүтүнэн саҕалыа диэн СӨ Култуура уонна духуобунай сайдыы министиэристибэтиттэн иһитиннэрэллэр.
Тыйаатыр көрөөччүлэргэ ураты бэлэҕэ балаҕан ыйын 18 күнүгэр былааннаммыт. Онон сэргээбиттэр, сэҥээрбиттэр бу күн А.Е.Кулаковскай аатынан норуоттар доҕордоһууларын дьиэтин таһыгар, искибиэргэ, мустуохтарын сөп. Манна сыһыары тутан эттэххэ, Олоҥхо тыйаатыра, били, кэпсэлгэ киирбит эпос уонна ускуустуба Арктикатааҕы киинэ тутуллуор диэри бу норуоттар доҕордоһууларын дьиэтигэр үлэлиэхтээх. Онон дьукаахтаспыт тэрилтэлэр бииргэ үлэлииргэ, араас бырайыактары толкуйдуурга баҕалаахтарын бэйэ-бэйэлэригэр хардарыта эппиттэр.
Көмүс күһүн үүннэ, үлэ саҥалыы саҕаланна. Ону кытары тэбис-тэҥҥэ Олоҥхо тыйаатыра ураты тыынынан үлэтин саҕалаата. Быйыл кинилэр «Кыыс Дэбилийэ», «Кулан Кыыртай» олоҥхолору сэргэ, «Улуу Даарын», «Сылгы Уола Дыырай бухатыыр», «Өрүс бэлэхтэрэ» көрдөрөр былааннаахтар.