Айылҕа харыстабылыгар нэһилиэнньэ ортотугар өйдөтөр-биллэрэр-биллэрэр үлэни ыытыы олус суолталаах. Ол иһин, тустаах министиэристибэ Тааттатааҕы экологияҕа кэтэбилин иниспиэксийэтэ хонтуруол эрэ үлэтинэн муҥурдаммакка, оскуолаҕа, нэһилиэнньэҕэ сырдатыы үлэтин күүстээхтик ыытар.
edersaas.ru
Ол курдук, Ытык Күөлгэ Эдэр натуралистар ыстаансыйаларын кытта ыкса бииргэ үлэлииллэр. Улуус оскуолаларын ситимниир “ЭкоТаатта» диэн оҕо экологическай общественнай тэрилтэтин тэрийэн, улууска араас таһымнаах аахсыйалары, куонкурустары, субуотунньуктары ыыталлар. Ордук “Чыычаах күнүн”, “Сир күнүн”, “Уу күнүн” тэрийии кэрэхсэбили ылар.
— Ону таһынан “Сатабыл” диэн оҕо айымньытын тэрилтэтин кытта бииргэ үлэлиибит. Ол курдук, сылын ахсын ыытыллар улуустааҕы “Зарница” күрэххэ “Тулалыыр эйгэбит экологията” диэн куонкурус бэрт тэрээһиннээхтик барар.
Өрөспүүбүлүкэҕэ ньургуһун күнэ бэлиэтэнэрэ хаһыс да сыла. Ол чэрчитинэн биһиги улууска “Таатта” өрөспүүбүлүкэтээҕи мусуой-заповеднигы кытта “Ньургуһун күнүн” тэрийэбит.
Иниспиэксийэбит улуус осуолаларын кытта биирдиилээн ыкса үлэлиир . Ол курдук сылын ахсын Ытык Күөл бастакы нүөмэрдээх оскуолатын кытта сылын ахсын экологическай “Дьиэ кэргэн олимпиадата” куонкурус үгүс кыттааччыны түмэр. Манна оҕолор төрөппүттэрин кытта араас оҥоһуктары, уруһуйдары оҥорон кытталлар. Ону таһынан эмиэ бу оскуоланы кытта сайыҥҥы эколого-биологическай эспэдииссийэ тэриллэр. Бу эспэдиисийэ сыала соруга диэн Таатта үрэх уутун, үөнүн-көйүүрүн, балыгын, үүнээйитин үөрэтии-чинчийии буолар. Бу үөрэппит матырыйаалларынан оскуола, оҕолор өрөспүүбүлүкэ таһымнаах граннарга, олимпиадаларга уонна куонкурустарга кытталлар.
Маны таһынан Чычымах орто оскуолатын кытта эмиэ ыкса үлэлиибит. Бу оскуола үөрэнээччилэрэ өрөспүүбүлүкэҕэ ыытыллар куонкурустарга, граннарга ситиһиилээхтик кыттаннар, миэстэлэһэллэр.
Оскуола саастаах оҕолоругар эрэ буолбакка, оҕо уһуйааччыларыгар эмиэ бу кэнники сылга сылын ахсын «Кырачаан-экологтар» диэн экологическай куонкурус сэргэхтик барар.
Бу буолар тэрээһиннэргэ иниспиэксийэ үлэһиттэрэ (иниспиэктэрдэр) нэһилиэнньэҕэ, оскуолаҕа аһагас уруоктарга тиийэн араас бэсиэдэлэри куонкурстары ыыталлар уонна практическай көмөнү оҥороллор, — диэн кэпсээтэ Тааттатааҕы экологияҕа кэтэбил иниспиэксийэтин салайааччыта Георгий Николаев.
2013 сылтан улууска “Таатта улууһугар экологическай үөрэхтээһин уонна сырдатыы”диэн муниципальнай тус сыаллаах бырагыраама ылыллан, иниспиэксийэ бу ыытар тэрээһиннэригэр күүс-көмө буолар.
Женни Стрюкова, edersaas.ru
Хаартысканы тустаах иниспиэксийэ биэрдэ