Ахсынньы 24 күнүгэр Хаҥалас улууһун Күөрдэм сэлиэнньэтигэр (2-с Дьөппөн) тыйаатыр уонна киинэ артыыһа Михаил Скрябин сырдык кэриэһигэр анаммыт «Тыыннаахпар» ахтыы-киэһэтэ буолан ааста. Кини эдэр сааһыттан ыарахан ыарыыны утары турууласпыт, артыыс уустук үлэтигэр бэриниитин күүһүнэн олоҕун тиһэх күнүгэр диэри үрдүк сценаттан арахсыбатах, аат-суол эккирэтиитигэр үлүмнэспэтэх, Арассыыйа талааннаах режиссера Алексей Балабанов киинэлэригэр оонньообут уһулуччулаах артыыс.
Биир дойдулаахтарын көҕүлээһиннэринэн уонна тэрээһиннэринэн ыытыллыбыт истиҥ-иһирэх киэһэҕэ Былатыан Ойуунускай аатынан уонна Ньурбатааҕы көһө сылдьар тыйаатыр артыыстара кытыннылар. Ыҥырыылаах ыалдьыттары Күөрдэмнээҕи норуодунай тыйаатыр артыыстара итии чэйдээх, сылаас алаадьылаах көрүстүлэр. Алгысчыт алгыһын кэнниттэн баһылык Андрей Варламов «төгүрүк остуолу» иилээн-саҕалаан ыытта. Кыраайы үөрэтээччи Фаина Адамова Дьөппөн, Самартай сыһыытын, дьонун-сэргэтин билиһиннэрдэ. Андрей Анатольевич инники былааннарын, ол иһигэр эһиил нэһилиэк – 250, таҥара дьиэтэ тутуллубута 125 сыллара туоларын, сайын үбүлүөйдээх ыһыах ыһылларын, эһиил кулун тутар 18 күнүгэр киин куоракка Нэһилиэк күннэрэ ыытыллыахтаахтарын билиһиннэрдэ. Онно бэлэмнэнии боппуруостарыгар тыйаатыр артыыстарын уонна Прокопий Ноговицын, Роберт Захаров, Максим Аммосов, Феликс Лебедев, Юрий Федоров уо.д.а. сүбэлэрин-амаларын иһиттилэр.
Эбиэт кэнниттэн оскуола үөрэнээччилэрин кытары көрсүһүүгэ Михаил Скрябины кытары Москватааҕы Щепкин аатынан училищеҕа биир кууруска үөрэммит, 1966 с. Ньурба тыйаатырыгар үлэлии кэлбит артыыстар Михаил Апросимов (Саха тыйаатыра), Петр Садовников (Саха тыйаатырын кэлиҥҥи көлүөнэ артыһа), Петр Андреев (Үүнэр көлүөнэ тыйаатыра), Ньурбатааҕы көһө сылдьар тыйаатыртан СӨ үтүөлээх артыыската Александра Кривогорницына, СӨ култууратын туйгуна Розалия Тартакынова, Прокопий Федоров кытыннылар. Кинилэр Михаил Архипович драмаҕа үлэтин сэргэ, киинэҕэ элбэхтик уһуллубут артыыстартан биирдэстэрэ уонна уһулуччулаахтара (аҥаардас А.Балабанов үс киинэтигэр уһуллуу – сэдэх көстүү уонна артыыска улахан итэҕэл сүктэриллиитэ) Михаил Скрябин туһунан истиҥник-иһирэхтик аҕыннылар.
Киэһэ 17:00 чаастан дьөппөннөр биир киэн туттуулара буолбут Култуура саҥа дьиэтигэр «Тыыннаахпар» диэн ахтыы киэһэтигэр муһуннулар. Көрөөччүлэр М.Скрябин олоҕун сырдатар быыстапкалары сиһилии билистилэр, биһирээбиттэрин биллэрдилэр.
Театральнай туруорууга «Күөрдэм кэскилэ», «Сыккыс», Күөрдэмнээҕи норуодунай тыйаатыр артыыстара М.Скрябин оҕо сааһыттан саҕалаан олоҕун көрдөрдүлэр. «Тыыннаахпар» диэн саҥа килиип сүрэхтэниитигэр биир дойдулаахтара, үөлээннээхтэрэ харахтарын уутун кыайан туттумматылар. Саха тыйаатырын артыыһа, СӨ култууратын үтүөлээх үлэһитэ Куприян Михайлов матыыбыгар уонна толоруутугар ырыанан доҕуһуолламмыт килиипкэ Михаил Архипович олоҕун киэҥ көрөөччүгэ биллэ илик түгэннэрэ, артыыс быһыытынан дьулуура-тулуура, кэмигэр ситэ сыаналаммакка хаалбыт талаана итэҕэтиилээхтик арылынна. Покровскай 1 №-дээх орто оскуолатыгар бииргэ үөрэммит дьоно сценаҕа толору тахсан, истиҥ-иһирэх ахтыылары оҥордулар.
Михаил Скрябин олоҕун аргыһа Клара Макаровна, кыыһа Светлана кэргэнинээн, оҕолорунаан, бииргэ төрөөбүттэр ахтыы-киэһэтин тэрийбит дьоҥҥо уонна ыалдьыттарга махталларын эттилэр.
Надежда ЕГОРОВА, «Саха сирэ» хаһыат, edersaas.ru
Михаил Скрябин «Кочегар» киинэ (2010) трейлерэ: