Чурапчы улууһун Арыылаах нэһилиэгэр олохтоох Терентий Федорович Карсанаев сэриигэ биэс уолун атаарбыта.
edersaas.ru.
1941 сыллаах бастакы хомуурга Серафим уонна Филипп барбыттара. Сотору Серафим сураҕа суох сүппүтүн туһунан сурах иһиллибитэ, онтон үлэ фронугар түбэспит Филипп 1942 сыллаахха ыалдьан өлбүтүн туһунан биллэрии кэлбитэ.
1942 сыллаахха Никиталаах Афанасий бэбиэскэ тутан барбыттара. Афанасий арҕаа фроҥҥа сэриилэһэ сылдьан ыараханнык бааһыран, инбэлиит буолан 1943 сыллаахха кэлбитэ. Танкист Никита Харьков, Воронеж, Доннааҕы Ростов куораттары, Прибалтиканы босхолоспута. 1944 сыллаахха ыараханнык бааһыран, дойдутугар 1945 сыллаахха саас кэлбитэ.
Кыра быраат Петр Терентьевич Карсанаев Кытаанах сэттэ кылаастаах оскуолатын кэнниттэн Дьокуускайдааҕы гимназияҕа (билигин 8 №-дээх оскуолаҕа) үөрэнэ сылдьан, 1943 сыл сайыныгар аармыйаҕа барбыта. Саха сириттэн тиийбит байыастары ый кэриҥэ Иркутскайга мас соҕотуопкатыгар үлэлэтэн баран, аттары арыаллатан байыаннай эшелонунан арҕаа атаарбыттара. Украина сиригэр, Чугуевскай ыстаансыйатыгар эмиэ маска үлэлэтэн баран, сэриигэ киллэрбиттэрэ.
Петр 188-с стрелковай полк байыаһа буолан, Харьков куорат таһыгар, Дон уонна Донец өрүстэр кирбиилэригэр сэриилэспитэ. Биир кырыктаах кыргыһыыга төбөтүгэр уонна санныгар ыараханнык бааһыран, кыа хаанынан устан, өйө суох сыттаҕына, санитардар буланнар, госпитальга киллэрбиттэрэ. Онон 1943 сыл атырдьах ыйын 25 күнүттэн саҕалаан, хас да госпиталынан бэрт уһуннук эмтэнэн, дойдугар 1944 сыл сааһыгар инбэлиит буолан эргиллибитэ.
Билиигэ-көрүүгэ баҕалаах эдэр киһи 1950 сыллаахха Дьокуускайдааҕы художественнай училищены бүтэрбитэ. Саха сиринээҕи художественнай пуондаҕа худуоһунньугунан, дойдутугар оскуолаҕа уруһуй учууталынан үлэлээбитэ.
Онтон 1975 сылтан саҕалаан 1990 сыллаахха диэри Чурапчытааҕы лесхозка ойууру көрөөччүнэн үлэлээбитэ. Үтүө суобастаах үлэтинэн эдэр биир идэлээхтэригэр мэлдьи холобур буолара. Чуолаан бу кэмҥэ Петр Терентьевич айылҕа араас кэрэ көстүүлэрин болотунаҕа дьүһүйэр уран ойууһут быһыытынан талаана тахсыбыта. Үгүс быыстапкаларга ситиһиилээхтик кыттыбыта. Арассыыйа Худуоһунньуктарын соһууйун, Арассыыйа худуоһунньуктарын Айар сойууһун чилиэнэ буолбута. Кини үгүс үлэтэ Чурапчы улууһун уонна өрөспүүбүлүкэ мусуойдарын пуондаларын хаҥатта.
Кыһынын куоракка кыстыыр, сайынын сиэннэригэр Чурапчыга тахсар, 97-с хаарыгар үктэммит кырдьаҕас худуоһунньук Петр Терентьевич Карсанаев билигин даҕаны киистэтин илиититтэн ыһыктыбат.
Раиса Сибирякова, «Саха сирэ» хаһыат, edersaas.ru