92 сааһыгар үктэммит библиотека саамай кырдьаҕас ааҕааччыта Семен Максимович Филиппов — Сиэн Сэмэн Сунтаар култууратын үлэһиттэрин профсойууһун оройуоннааҕы кэмитиэтигэр өр кэмнэргэ үлэлээбит, улуус хаһыатын общественнай корреспондена саҥа кинигэтэ сүрэхтэннэ.
edersaas.ru
Түбэй нэһилиэгиттэн төрүттээх тыыл, үлэ бэтэрээнэ, ытыктыыр аҕам саастаах ааҕааччыбыт Сиэн Сэмэн олоҕун, үлэтин сорох кэрчигин, бииргэ үлэлээбит, алтыспыт дьоннорун, урууларын-аймахтарын тустарынан ахтыыларын, хаһыакка тахсыбыт ыстатыйаларын, көрүдьүөс тэттик дьүһүйүүлэрин, истиҥ иэйиилээх этиилэрин таҥан «Истиҥ санаалар, иһирэх иэйиилэр» диэн саҥа кинигэтин Сунтаар улууһун библиотекардарын семинарыгар билиһиннэрдэ. Саҥа кинигэ Сунтаар улууһун типографиятыгар 100 ахсаанынан бэчээттэнэн таҕыста. Кинигэ ааҕааччы киэҥ араҥатыгар ананар, библиотекаларга барыларыгар тигистэ.
Бэлиэ күнүгэр ытык кырдьаҕаспытын Сунтаар култууратын салалтатын салайааччыта Мария Кобельянова -Тускулаана, улуус хаһыатын редакциятыттан Иван Чагдинскай кэлэн эҕэрдэлээтилэр. Кинигэ сүрэхтэниитигэр Сиэн Сэмэн «Дьоллоох сыыппара» диэн лотерея оонньотон, сэргэхсийиини таһаарда. 100 сыыппараны тардан таһаарбыт Аллыҥа библиотекара Ньургуйаана Саввинова ааптар кинигэтин бириис ылла.
Л.А.Попов аатынан киин бибилэтиэкэ ааҕааччыны кытта үлэлиир салаата, edersaas.ru