91 испэктээги көрдөрөн, 7000 көрөөччүнү хабан, Саха тыйаатыра гастроллаан кэллэ
Кулун тутар 27 күнэ – Тыйаатыр аан дойдутааҕы күнэ!
Былатыан Ойуунускай аатынан Саха академическай тыйаатырын артыыстара өрөспүүбүлүкэ улуустарынан – Абыйынан, Муоманан, Сунтаарынан, Уус Алданынан гастроллаан кэлэн, идэлээх бырааһынньыктарын көрсө айар командировкаларын отчуоттаатылар.
Быйылгы гастроль (олунньу 20 —кулун тутар 23 күннэрэ) бэрт ситиһиилээхтик барда, табылынна диэн бэлиэтэннэ. Ол курдук, СӨ үтүөлээх артыыһа Айаал Аммосов, СӨ үтүөлээх артыыһа Дмитрий Михайлов уонна артыыс Петр Макаров салайааччылаах гастроллуур биригээдэлэр улуустарга былаан быһыытынан 5900 көрөөччү оннугар 7000 көрөөччүнү хабан, 87 оннугар 91 испэктээги көрдөрөн, былааннарын бары өттүнэн 120 бырыһыан толорон, куоһаран кэллилэр.
—Сүрүн сыалбыт-сорукпут – ыраах сытар улуустарга, түгэх нэһилиэктэргэ тиийии буолар. Ол ситиһилиннэ. Артыыстар нэһилиэнньэни, оскуола оҕолорун кытта көрүстүлэр, Норуодунай тыйаатырдаах бөһүөлэктэргэ, нэһилиэктэргэ маастар-кылаастары ыыттылар. Тыйаатыр администрацията СӨ Бырабыыталыстыбатыгар, улуустар дьаһалталарыгар, нэһилиэктэрдээҕи Култуура дьиэлэригэр, олохтоохторго, артыыстарбытын олус үчүгэйдик көрсүбүттэрин иһин махталын тиэрдэр, — диир тыйаатыр дириэктэрин көрөөччүнү кытта үлэҕэ солбуйааччы Михаил Егоров.
Бүгүн Саха тыйаатыра үс испэктээги көрдөрөр. Сарсыардаттан оҕолорго “Кустук”, киэһээ — “Олох дьэбэрэтэ”. Бу испэктээктэн киирбит үп дьиэтин уокка былдьаппыт режиссер Лена Гримм дьиэ кэргэнигэр көмөҕө ананыаҕа.
Кулун тутар 28 күнүттэн Саха тыйаатырыгар “Алгыс” оҕо испэктээгэ саҕаланыаҕа. Бу – “Харысхал” аһымал пуондатын “Маленький принц” инклюзивнай тыйаатырын кытта холбуһуктаах бырайыак. Испэктээккэ инбэлиит-оҕолор кыттыыны ылаллар. Режиссер – Лена Гримм.
Оттон кулун тутар 29-31 күннэригэр тыйаатыр көрөөччүтүн “Төлкө” испэктээккэ ыҥырар. Режиссер Руслан Тараховскай.
Татьяна МАРКОВА, «Саха сирэ» хаһыат, edersaas.ru