9-с кылаастар эксээмэннэрин бэс ыйын 8 күнүттэн ыытары былаанныыллар
Үөрэҕи уонна науканы кэтээн көрөр федеральнай киин саайтыгар быйылгы 9-с кылаастар эксээмэннэрин бэс ыйын 8 — от ыйын 31 күннэригэр ыытары былаанныылларын туһунан иһитиннэрбиттэр.
Саайтка сурулларынан, Үөрэҕи уонна науканы кэтээн көрөр федеральнай киин итиэннэ РФ Үөрэҕириигэ министиэристибэтэ 9-с кылаастарга ыытыллар сүрүн судаарыстыбаннай эксээмэн (ОГЭ) уонна судаарыстыбаннай түмүктүүр эксээмэн (ГВЭ, доруобуйаларынан хааччахтаах оҕолорго) араспысаанньатын бырайыагын оҥорбуттар. Саҥа бырайыакка олоҕуран, эксээмэн бэс ыйын 8 күнүттэн от ыйын 31 күнүгэр диэри буолуо дииллэр.
Эрэгийиэннээҕи толорор былаас уорганнара, кыраныысса таһынааҕы оскуолалар тэрийэн таһаарааччылара (учредители), математика уонна нуучча тылын биридимиэттэригэр эксээмэннэр сүрүн уонна резервнэй түһүмэхтэрин күннэрин, бу ыйыллыбыт кэрчик кэмҥэ бэйэлэрэ быһааран ыытыахтарын сөп диэбиттэр. Эрдэ этиллибитин курдук, быйыл 9-с кылаастар талар эксээмэни туттарбаттар.
Аҕыйах хонуктааҕыта, коронавируһунан сибээстээн, биир кэлим эксээмэни (11-с кылаас) бэс ыйын 8 күнүттэн саҕалыыр гына араспысаанньа бырайыагын оҥорбуттара. Өскөтүн, 9-с кылаастар эксээмэннэрин бэс ыйын 8 күнүгэр көһөрөөрү гынар буоллахтарына, 11-с кылаастар эксээмэннэрэ сыҕарыйан биэрэр диэн сабаҕалыахха сөп. Тоҕо диэтэххэ, урукку сылларга 11-с уонна 9-с кылаастар эксээмэннэрэ хаһан даҕаны биир күҥҥэ ыытыллыбат этэ.
Людмила ПОПОВА, edersaas.ru
Архыып хаартыската: Мария ВАСИЛЬЕВА (СИА).