9-с кылаас үөрэнээччилэрэ нуучча тылыгар собеседование ааһыахтара
Эһиил, 2018 сылга Арассыыйа 9-с кылааһын үөрэнээччилэрэ бары нуучча тылыгар түмүктүүр кэпсэтэн көрүүнү (собеседование) ааһыахтара. Ити туһунан Үөрэх уонна наука эйгэтин хонтуруоллуур федеральнай сулууспа саайтыгар суруйаллар.
edersaas.ru
Кэпсэтэн көрүү, оскуола үөрэнээччилэрэ тылынан саҥарар үөрүйэхтэрин бэрэбиэркэлиир сыалтан, нуучча тылын уонна литэрэтиирэтин үөрэтии Кэнсиэпсийэтин олоххо киллэрии чэрчитинэн ыытыллар. Кэпсэтэн көрүү муус устар 13 уонна 16 күннэригэр буолуоҕа. Инникитин 9-с кылаас үөрэнээччилэрэ эксээмэҥҥэ (cудаарыстыбыннай итоговай аттестация) киирэллэригэр быраап биэриэ диэн былаанныыллар. Ол эрээри, кэлэр муус устардааҕы кэпсэтэн көрүү 9-с кылаас үөрэнээччилэрэ эксээмэҥҥэ киирэллэригэр дьайыа суоҕа диэн этэллэр.
Былырыын алтынньыга нуучча тылыгар эксээмэн тылынан чааһын икки моделын пилотнай бырайыак быһыытынан Арассыыйа үс эрэгийиэнигэр ыытан көрбүттэр. Оттон быйыл дойду 61 субъегын үөрэнээччилэрэ кыттыбыттар. Атыттарга итинник боруобаланан көрүү 2018 сыл олунньу 14-16 күннэригэр барыаҕа, ол эрэ кэнниттэн 9-с кылаас үөрэнээччилэрэ туттарыахтара.
Түмүктүүр кэпсэтэн көрүүнү оҕолор бэйэлэрин оскуолаларыгар ааһыахтара. Итиэннэ “зачет”, “незачет” диэн туруоруллуоҕа. Бэлэмнэнэллэригэр 1 мүнүүтэ курдук бириэмэ бэриллиэҕэ, онтон кэпсэтэн көрүү быһа холоон 15 мүн устата барыаҕа.
Садаанньаҕа бэлэм тиэкиһи иһиллэр гына ааҕыы, тиэкиһи эбэн-сабан кэпсээһин, биир тиэмэни талан монолог этии, кэпсэтэн сэһэргэһиини (собеседование) ыытар эксээмэн тутааччыны кытта диалог киириэҕэ. Ааҕыыга бэриллэр тиэкис барыта Арассыыйа биллиилээх дьонун туһунан буолуоҕа. Садаанньаны толорууну анал киритиэрийдэринэн эксперт сыаналыаҕа.
Людмила ПОПОВА, “Саха сирэ” хаһыат, edersaas.ru