Саха Өрөспүүбүлүкэтин 80-тан тахса социальнай суолталаах өҥөлөрүн барытын электроннай ньыманан «Госуслуги» порталга оҥоруохха сөп буолла – ол туһунан Саха Өрөспүүбүлүкэтин Инновацияҕа, цифровой сайдыыга уонна инфокоммуникационнай технологияларга министиэристибэтин пресс-сулууспата иһитиннэрэр.
Санатан эттэххэ, Арассыыйа бэрэсидьиэнэ Владимир Путин бары социальнай суолталаах өҥөлөр 2021 cыл бүтүүтэ цифровой көрүҥҥэ көһүөхтээхтэр диэн сорудах биэрбитэ. Дойду Федеральнай Мунньаҕар анаан ыыппыт Этиитигэр чуолаан маннык эппитэ «Арассыыйа гражданнарыгар анаан дойду судаарыстыбаннай уонна муниципальнай өҥөлөрүн улахан өрүтэ суукка 24 чааһыгар, нэдиэлэ 7 күнүгэр, ол аата бастайааннай төрүккэ оҥоһуллуохтаахтар» диэн.
Билигин РФ Цифровой сайдыыга, сибээскэ уонна маассабай коммуникацияларга министиэристибэтэ социальнай суолталаах судаарыстыбаннай уонна муниципальнай өҥөлөрү электроннай көрүҥҥэ көһөрүү тэрээһиннэрин былаанын бэлэмнээтэ. Бу докумуон быһыытынан ити көһөрүү үс түһүмэхтэн турар уонна 2021 сыл ахсынньытыгар түмүктэнэр. РФ «Цифровой уларыта тутуу» Национальнай сыалынан социальнай суолталаах өҥөлөр 95 % -нара электроннай көрүҥҥэ уларыйыахтаах.
Судаарыстыбаннай былаас уонна олохтоох салайыныы уорганнарын эрэгийиэннээҕи салаалара бэйэлэрин таһымнарыгар нэһилиэнньэ саамай наадыйар өҥөлөрүн ахсааннарын испииһэгин оҥордулар. Бу испииһэккэ маннык өҥөлөр киирсэллэр: тутууга сыһыаннаах өҥөлөр (олорор дьиэни тутуу уонна дьиэ былаанын уларытыы, градостроительнай былааны биэрии, олорор дьиэни олорбот дьиэҕэ кубулутуу), сир уонна бас билиигэ сыһыаннаах өҥөлөр (сир учаастактарын биэрии), үөрэҕириигэ сыһыаннаах өҥөлөр (каникул кэмигэр оскуола үөрэнээччилэрин сынньалаҥнарын тэрийии), нэһилиэнньэ социальнай харысхаллаах буолуутугар өҥөлөр (оҕоҕо анаан араас төлөбүрдэри биэрии), айылҕаны туһаныыга сыһыаннаах, дьону тиэйиигэ-таһыыга өҥөлөр о.д.а.
https://www.gosuslugi.ru/ биир кэлимсэ өҥөлөр порталларыгар Былаан хайысхатынан сөптөөх үлэлэр бараллар: өҥөлөр улахан аҥаардара «Госуслуги» порталга киирдилэр.
edersaas.ru