Тохсунньуттан 80 саастарын туолбут кырдьаҕастар биэнсийэлэригэр эбии төлөбүр үрдээтэ. Киһи 80 сааһын туоллаҕына, биэнсийэтигэр 5334 солк. эбиллэр. Былырыын ити эбии төлөбүр суумата 4892 солк. этэ. Онон 442 солкуобайынан үрдээбит эбит.
edersaas.ru
Маннык эбии төлөбүрү кырдьар саастарынан страховой биэнсийэҕэ тахсыбыттар эрэ ылаллар. Иитэр-аһатар киһини сүтэрбитигэр бэриллэр, эбэтэр социальнай (ыстааһа тиийбэтинэн) биэнсийэни ылааччыларга маннык төлөбүр суох. I группалаах инбэлииттэр биэнсийэлэригэр эмиэ бэриллибэт, тоҕо диэтэр, кинилэр икки бүк эбии төлөбүрү номнуо ыла сылдьаллар.
Ону тэҥэ, кырдьаҕас киһини көрө-истэ олорор, үлэлээбэт киһиэхэ 1200 солк. суумалаах эбии төлөбүр эмиэ көрүллэр. Кини аймаҕа буолбатах, бииргэ олорбот буолуон сөп. Көрөр-истэр киһиэхэ инникитин ылыахтаах биэнсийэтигэр страховой ыстааһа уонна сылга 1,8 баал ааҕыллар. Оттон эбии төлөбүр харчыта кырдьаҕас биэнсийэтигэр ааҕыллар. Бу төлөбүрү ыларга наадалаах докумуоннары уонна ыспыраапкалары, сайабылыанньаны илдьиэххэ наада.
Ыспыраапка:
Биэнсийэ пуондатын Саха сиринээҕи салаата иһитиннэрэринэн, 80 саастарын туолбут, биэнсийэҕэ эбии төлөбүрү ылар дьон ахсаана – 12,2 тыһ. киһи (2018 сылга).
Ангелина Васильева, “Саха сирэ” хаһыат, edersaas.ru