Сунтаарга 80-наах кырдьаҕастар муода көрдөрдүлэр (ВИДЕО)

Бөлөххө киир:

Ааспыт субуотаҕа Сунтаар улууһун үгүс нэһилиэктэригэр кыһыны атаарыы бырааһынньыктара буолан аастылар. Ону тэҥэ араас кэнсиэртэр, күрэхтэһиилэр ыытылыннылар. Кириэстээххэ сааскы бэстибээл кэмигэр “Алаас” түөлбэ эр дьоно муода көрдөрөн, улахан кэрэхсэбили ыллылар.

Эһээлэр эдэр эрдэхтэринэ, 60-70-с сылларга кэппит таҥастарын ампаартан булан, тэбээн-сахсыйан, өтүүктээн баран, сыанаҕа тахсан, сэбиэскэй таҥас муодатын көрдөрбүттэр. Оччотооҕу плащтар, соннор, сэлээппэлэр билигин да олус муодунай көрүҥнээхтэрин көрөөччүлэр сөҕөн эрэ кэбиспиттэр. Буолумуна, 60-с сыллардааҕы, “ириэрии” кэминээҕи  ыччат таҥаһа эрэ буолбакка, өйө-санаата эмиэ көҥүл, ураты этэ. Килиэккэ көстүүмнэр, чаҕылхай өҥнөөх, геометрическэй ойуулаах, синтетика таҥастар, трапеция быһыылаах былааччыйалар, “бабетта” бүрүчүөскэлэр, күлүөс ыстааннар, уо.д.а. — 60-70-с сыллар муодаларын көстүүлэрэ.

Киһи үөрэрэ, муода көрдөрүүтүгэр 81 саастаах Василий Иванович Васильев уонна 80-наах Афанасий Афанасьевич Афанасьев кыттыбыттар. Кинилэр модель уобараһыгар киирэн, кимнээҕэр эдэрдии хамсанан, эрчимнээхтик хаампыттарыгар, көрөөччүлэр сүрдээҕин биһирээн, ытыстарын тыаһын харыстаабатахтар. Биир дойдулаахтара күн аайы көрөр дьонноро, ыал эһэлэрэ бу маннык киһи билбэт курдук уларыйан, маанымсыйан, өссө ханнык эрэ киинэ артыыстарыгар маарыннаан, сыанаҕа тахсыбыттарын олус сөхпүттэр. Нууччалыы эттэххэ, “элегантнай” уобарастары арыйбыттар. Киһи сааһыран да баран, олоххо тардыһыылаах, барытыгар көхтөөх, айымньылаах сыһыаннаах, булугас өйдөөх, сайаҕас санаалаах буоларын кинилэр өссө төгүл дакаастаабыттар.

Эр дьон хас да күн инниттэн эрэпэтииссийэлээн, анаан бэлэмнэммиттэр, хаамарга үөрэммиттэр эбит. Түөлбэнэн күрэхтэһии кэмигэр сүрдээҕин сэргэхсийбиттэр.

Васильевтар сиэннэрин, хос сиэннэрин кытта — Сыстаҥ сайылыктарыгар. 

Санатар буоллахха, Васильевтар тустарынан “Саха сирэ” хаһыакка суруйан турабыт. Былырыын алтынньыга “Дьоруой Ийэ Даарыйа” диэн ыстатыйа бэчээттэммитэ. Василий Иванович кэргэнэ Дария Ивановналыын алта уонча сыл иллээхтик-эйэлээхтик олорон, 11 оҕону төрөтөн, улаатыннаран, атахтарыгар туруорбуттара. Билигин элбэх сиэн, хос сиэн тапталларыгар сууланан, иккиэ  бэйэлэрэ биэс уонча буола кэҥээн-тэнийэн, саханы элбэтэн, үгэстэри, сиэри-туому тутуһан, сирдээҕи дьолу билэн, быр-бааччы олорор саха дьоһун-мааны ыала. Быйыл Бриллиантовай сыбаайбаларын бэлиэтиэхтэрэ.

Бэстибээл хас да түһүмэхтээх. Бастакы түһүмэх түмүгүнэн, “Алаас” түөлбэ бастаан иһэр.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0