Бу аҕыйах хонуктааҕыта WhatsАpp ситиминэн омуктар оҕурсуга куһаҕан ыарыынан ыалдьыбыт киһи хаанын соруйан испирииһинэн куппуттар диэн сымыйата-кырдьыга биллибэт сурах тарҕаммыта. Ардыгар маҕаһыынтан атыылаһан кэлэн баран аһыйбыт үрүҥ ас, буортуйбут балык, мөлтөх хаачыстыбалаах табаар түбэстэҕинэ төттөрү барыаххын сүрэҕэлдьээн, көннөрү быраҕан кэбиһэҕин. Билигин маннык түгэҥҥэ хонтуруоллуур уорганнары кытта быһа сибээскэ тахсар, күнүстэри-түүннэри үлэлиир төлөпүөн баар буолла.
edersaas.ru
Ол курдук 2019 сыл муус 1 күнүттэн Роспотребнадзор киһи чөл туруктаах буоларын хонтуруоллуур, табаары уонна өҥөнү туһанааччылар бырааптарын көмүскүүр федеральнай сулууспа сүбэ-ама биэрэр биир кэлим киинэ үлэтин саҕалаата.
Суукка хайа баҕарар кэмигэр 8 800 555 49 43 нүөмэргэ босхо эрийэн тиийэн, ханнык маҕаһыыҥҥа харайыллар болдьоҕо ааспыт, буортуйбут аһы-үөлү атыыласпыккытын, быраапкытын күөмчүлээбиттэрин туһунан этиэххитин сөп. Биир кэлим киин үлэһиттэрэ маннык түгэҥҥэ тугу оҥорорго, кимиэхэ сайабылыанньа суруйарга сүбэлээн биэриэхтэрэ. 8 800 555 49 43 төлөпүөҥҥэ биир тэҥинэн 100 киһи эрийэн тиийиэхтэрэ. Төлөпүөҥҥэ эппиэттииллэрин дьон ортотунан биир мүнүүтэ кэтэһиэхтэрэ.
Үүммүт сыл бастакы кыбаарталыгар саҥа тэриллибит киин үлэтин тургутан көрөргө биирдиилээн дьонтон уонна тэрилтэлэртэн 14 443 ыйытыы киирбит.
Марианна Тыртыкова, «Саха сирэ», edersaas.ru