Киһи айар дьоҕурун туох хаайыа, хам баттыа баарай? Быйылгы “хаайтарыылаах” саас төһө да айылҕа уһуктуутун үгүспүтүгэр көрдөрбөтөр, биһиги оҕолорбут түннүк да нөҥүө чаҕылхай күнү, ыраас халлааны, көтөр-сүүрэр уһуктуутун таба көрөн, ыраас кумааҕыга түһэрэн уруһуйдууллар.
“777” минимаркет биллэрбит “Түннүккэ саас” диэн ааттаах оҕо уруһуйун күрэһигэр түөрт уонча оҕо чаҕылхай үлэлэрэ киирдэ.
— Бу саас барыбытыгар ыараханнык ааһан эрэр, чуолаан оҕолорго, — диэн кэпсиир урбаанньыт Наталья Храмцова. — Оҕолор бугуһуйа сылдьар ньэҥирдэрин дьиэ иһигэр хаайтаран олорон хайдах таһаарыахтарай? Ол иһин хааччахтаан олоруу айымньылаахтык аастын диэн, оҕолорго уруһуй күрэһин биллэрбиппит. Биһиги «Инстаграм» страницабытыгар ыытыллыбыт күрэскэ дьон болҕомтотун ууран бэркэ кытынна. Бэлиэтээн этэр буоллахха, биһиги страницабытыгар куруутун араас оонньуулары, чэпчэтиилэри, күрэстэри ыытабыт.
— Быйылгы хаайтарыы үлэҕит хаамыытын уларытта дуо?
— Биллэн турар, сонно тута интэриниэккэ атыы, бородууктаны дьиэҕэ тиэрдэн биэрии балысханнык сайдан эрэр. Бу кэм атыыһыттар уонна да атын урбаанньыттар уларыйыыларга төһө бэлэмнээхтэрин көрдөрдө. Бу дьаҥ ордук нэһилиэнньэ саастаах араҥатыгар дьайда, онон биһиги үтүө дьыала чэрчитинэн биэнсийэлээхтэргэ, кыамматтарга бородуукталарын босхо тиэрдэн биэрэр аахсыйа биллэрбиппит. Маны сэргэ волонтердары кытта үлэлиэхпитин саныыбыт, кинилэр штабтарын хоруйун күүтэбит.
— Бу күрэскит түмүгүнэн үс кыайыылаах ааттанна…
— Элбэх оҕо аата ааттанара үчүгэй, эбиитин оҕолор наһаа кыһаллан уруһуйдаабыттар этэ. Бастакы кыайыылааҕы саамай элбэх куолас быһаарбыта. Иккис кыайыылаах үлэтин идэтийбит худуоһунньук, Дьокуускайдааҕы Л.А.Ким аатынан уруһуй оскуолатын преподавателэ Эдита Геннадьевна Степанова элбэх үлэттэн талан ылбыта. Оттон үһүс кыайыылааҕы соргута рандомунан быһаарбыта.
— Маннык күрэхтэр өссө ыытыллыахтара дуо?
— Хайаан даҕаны! Оҕолор уруһуйдарын көрө олорон киһи бэйэтэ оҕо курдук сананан күннээҕи түбүктэн аралдьыйан ылар. Маннык үөрүүлээх түгэннэри бэлэхтээбит кыттааччыларбытыгар, сурутааччыларбытыгар дириҥ махталбытын тиэрдэбит, өссө даҕаны биһиги ыытар күрэстэрибтигэр көхтөөхтүк кыттаарыҥ.
Дьэ, ити гынан, ким кыайыылаах үрдүк аатын сүктэй? Оҕолор түннүк нөҥүө ааһан эрэр сааһы хайдах уруһуйдаатылар?
ТЫҺЫЫНЧАТТАН ОРДУК СҮРЭХ
Низам Мехралиев быйылгы саас дьиэ иһигэр хаайбытын, онтон санаарҕыырын, доҕотторун ахтарын, күүлэйдиэн, оонньуон баҕарарын бэйэтин уруһуйугар олус тиийимтиэ гына уруһуйдаабыт. Кыайыыга дьулуурдаах уол кыайыыга тиэрдэр ыллыгын «Инстаграмҥа» биир биллэр блогер страницатын нөҥүө ыыппыт. Блогер эдэр худуоһунньукка көмөлөһөн, Низам уруһуйа биир тыһыынчаттан ордук куолаһы хомуйбут.
ХУДУОҺУННЬУК КЫРАҔЫ ХАРАҔЫНАН
Үөһэ этиллибитин курдук, дьүүллүүр сүбэни Эдита Степанова соҕотоҕун солбуйда. Кини оҕолору кытта үлэлиир буолан, уруһуйдары профессионал кыраҕы хараҕынан сыаналаата.
— Саамай кыра 5 саастаах кыттааччы Таяна Черкашина үлэтэ олус чаҕылхай, сааскы сырдыгы көрөөччүгэ тиэрдэр. Оҕо уруһуйун бэйэтэ оҥороро туохтааҕар да ордук, онно кини тулалыыр эйгэни анаарара, хайдах ылынара ырылыччы көстөр.
Дарина Данилова акварелинэн уруһуйа биһиги сирбит чараас, кэбирэх оҥоһуулааҕын ситэрэн көрдөрөр. Александр Попов үлэтигэр быйылгы саас чахчыта уруһуйдаммыт — компьютер мониторын иннигэр олорон ким тэйиччиттэн үөрэнэр, ким үлэлиир, ким оонньуур. Монитор — аан дойдуга түннүк. Виктория Оконешникова уруһуйа бүгүн таһырдьа хайдаҕын көрдөрөр, түннүккэ санаарҕаабыт кыыс олорор, оттон таһырдьа саас сандаарыйан турар. Уруһуй акварелинэн олус чэпчэкитин уонна умсугутуулаахтык оҥоһуллубут.
Барыларыттан ордугунан 13 саастаах Анжелина Олесова уруһуйа ааттанна.
— Анжелина уруһуйа быйылгы саас эмоциональнай туругун табан көрдөрбүт. Хартыынаҕа баар куоска курдук биһиги бары “утуйа” сытабыт, оттон таһырдьа айылҕа уһуктан, ыраас күөх халлааҥҥа дьэрэкээн былыттар усталлар. Чыычаахтар утуйа сытар куосканы дьиктиргээн “туох буолла бу сиргэ, тоҕо бары утуйа сыталлар” диэбиттии көрөллөр. Уруһуй композицията, өҥнөрүн аттарыыта бары өттүнэн сөптөөх, хорсун, эрэллээх илии уруһуйдаабыта биллэр.
СОРГУЛААХ УРУҺУЙДЬУТ
Күрэс үһүс кыайыылааҕын «Инстаграмҥа» быһа эфиргэ рандом чыыһылата быһаарда. 8 саастаах Юля Григорьева үлэтэ соргу хараҕын тардан ылла. Кырачаан Юля дьиэ харамайын олус сөбүлүүр буолан, хартыынатыгар куоскатын уруһуйдаабыт.
Кыайыылаахтар бары минньигэс бэлэхтэри туттулар. “777” минимаркет үлэһиттэрэ эдэр худуоһунньуктарга көхтөөх кыттыыларын иһин махтаналлар уонна айымньылаах олохторугар ситиһиилэри баҕараллар.
@777minimarket_ykt. страницатыгар суруттаххытына арас оонньууларга, күрэстэргэ кыттыаххыт, маҕаһыын ыытар аахсыйаларын, чэпчэтиилэрин билэ-көрө олоруоххут.
«777» минимаркеттарга маннык нүөмэрдэринэн сайаапка оҥоруоххутун сөп:
8-411-245-00-05 (Ярославского уул.3/1г)
8-411-221-88-18 ( Губина уул.2В)
8-411-221-00-28 (Б. Чижика уул.33Бс1)
Сайт аадырыһа: http://777minimarket.tilda.ws
Ватсап: 7-924-867-79-59
Инстаграм @777minimarket_ykt
#минимаркет777 #александрникифоров #запасынакарантин