От ыйын 10 күнүн сарсыардааҥҥы туругунан өрөспүүбүлүкэ үрдүнэн 10 ойуур баһаара умуруоруллубутун туһунан СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников иһитиннэрдэ.
Ол курдук, баһаар уота Мэҥэ Хаҥаласка, Алдаҥҥа, Өлөөҥҥө, Нерюнгригэ уонна «Өлүөнэ очуостара» национальнай пааркаҕа умуруоруллубут. Ааспыт сууккаҕа Сунтаарга, Уус Маайаҕа, Уус Алдаҥҥа, Мииринэйгэ, Эбээн Бытантайга, Алдаҥҥа эбии 9 ойуур баһаара турбута биллибитэ. Онон бүгүҥҥү күҥҥэ Саха сирин үрдүнэн 76 ойуур баһаара күөх дуолу мэҥиэстэр. Ааспыт сылга баччаҕа 305 ойуур баһаара умайара.
От ыйын 10 күнүгэр Алдаҥҥа, Мииринэйгэ, Нерюнгригэ, Өймөкөөҥҥө, Өлөөҥҥө, Сунтаарга, Томпоҕо, Уус Алдаҥҥа, Чурапчыга, Уус Маайаҕа, Эбээн Бытантайга 10 ойуур баһаарын умуруорууга тустаах үлэ ыытыллар. Мантан үһэ бохсулунна. Умуруорууга барыта 507 киһи үлэлиир уонна 36 тиэхиньикэ көмөлөһөр. Ааспыт суукка устата икки бөртөлүөт уонна 10 сөмөлүөт ойуур баһаарын умуруорууга аналлаах үлэҕэ кыттыбыттар. Бэҕэһээ, от ыйын 9 күнүгэр, Уус Маайа улууһугар Ан-26 «Циклон» сөмөлүөт искусственнай ардаҕы ыҥырыыга аналлаах көтүүнү оҥорбута.