Жатайга тутуу күргүөмнээхтик барар. Сотору бассейн тутуллан үлэҕэ киириэхтээх. «Маяк» култуура киинигэр киинэ көрдөрөллөр, араас дьоро киэһэлэри ыыталлар, оҕо спортивнай оскуолатыгар эрчиллэр саалалаахтар. Бөһүөлэккэ дьон сынньанарыгар сибэккилээх сквер, ыскамыайкалар, оҕо оонньуур былаһааккалара барыта баар.
Куорат бөһүөлэгин хас биирдии муннуга уурбут-туппут курдук олус чөкө, ыраас, дьиэлэрин, тэлгэһэлэрин көрүнэр, дойдуларын таптыыр дьон олороллоро тута көстөр. Өлүөнэтээҕи холбоһук таах өрүс пароходствотын тэрилтэтэ ыраахтан кылбайан көстөр бэрт тупсаҕай көрүҥнээх 9 мэндиэмэннээх дьиэни тутан таһаарбыт. Бу дьиэ тоҕо тутуллубута биллэр. Жатайга өрүс аалларын тутар, өрөмүөннүүр үрдүк технологиялаах собуот тутуутун бастакы атаҕын быйыл муус устарга түһэрбиттэрэ. 2022 сылга өрөспүүбүлүкэ төрүттэммитэ 100 сылын көрсө бастакы хараабыл ууга устуохтаах.
Быһа холоон, сылга уоннуу устар аал оҥоһуллуохтаах. Өрүс флотун саҥардарга собуокка 700 үлэ миэстэтэ тэриллиэхтээх. Манна сотору конструктордар, инженердэр, тутааччылар, мэхээнньиктэр, электрогазосварщиктар, технологтар, тимири уһаарааччылар, ыраастааччылар, тимир суудуна корпустарын таҥааччылар, гидротехниктар, энергетиктэр, электромонтажниктар уо.д.а. үрдүк уонна орто үөрэхтээх тиэхиньиичэскэй үлэһиттэр кэлиэхтэрэ. Өрүс аалларын оҥорор уонна өрөмүөннүүр собуот үлэһиттэрин орто хамнаһа, холобур, Уһук Илиҥҥэ 70 000 солкуобай.
СОБУОТ ҮЛЭҺИТТЭРИН ХАННА ҮӨРЭТЭЛЛЭР?
Билигин тыа сиригэр уонна куоракка үлэтэ суох киһи элбэх. Жатайга өрүс аалларын тутууга тэриллэр 700 үлэ миэстэтигэр, дьиҥэ, бэйэбит дьоммут хамнастаах үлэҕэ киирэн хаалыахтарын сөп этэ. Дьокуускайдааҕы өрүс тырааныспарын кыһата гидротиэхиньиичэскэй тутууга уонна уу суолунан дьону, таһаҕаһы тиэйэргэ орто, үрдүк үөрэхтээх исписэлиистэри бэлэмниир. Ону таһынан, Жатайдааҕы техникум электромонтердары, сварщиктары, суудуна электрооборудованиетын, автоматикатын дьаһайар үлэһиттэри, өрүс аалларын ыытар лоцманнары, хапытааннары уо.д.а. бэлэмнээн таһаарар. Улуустан кэлбит дьоҥҥо уопсай биэрэллэр.
Марианна Тыртыкова, «Саха сирэ»хаһыат, edersaas.ru